«Astana» fýtbol klýbynyń bas bapkeri Stanımır Stoılov sportal.bg portalyna bergen suhbatynda qazaqstandyq ujymmen aldaǵy maqsaty jaıly, sondaı-aq Eýropanyń úzdik chempıonattarynyń birinde qyzmet etkisi keletindigi týraly málimdedi.
«Bizdi tartysqa toly kezekti maýsym kútip tur. Qazirgi basty mindetimiz – aldaǵy chempıonatqa jáne eýrokýboktyq oıyndarǵa tyńǵylyqty daıyndalý. Eýropa klýbtarymen ótetin matchtar bar kúshimizdi alyp qoıatyny sózsiz. Mine, dál osy kezde ózińniń qanshalyqty bilikti maman ekeniń de synǵa túsedi. Al qalǵandary osynyń tóńireginde órbıdi. Árıne, batystyń alpaýyt ujymdarymen taıtalasyp, týrnırlerge joldama alý ylǵı da qolymyzdan kele bermeıdi. Biraq ýaqyt óte kele jankúıerlerdiń «Astanaǵa» degen pikiri de ózgerip jatqany baıqalady. Al endigisin jazda kóremiz», – dedi Stoılov.
«Eger sheteldik klýbtardan usynys tússe, ol jaǵyn da qarastyramyz. Eýropanyń úzdik klýbtarynyń birin jattyqtyrǵym keletinin jasyrmaımyn. Biraq bolgarııalyq tólqujat bul múmkindigimdi júzege asyrýǵa keri áserin tıgizip jatady. Sońǵy jyldary aıtarlyqtaı jumys atqarsaq ta, kópshilik biz týraly teris pikirde», – dedi «Astananyń» jattyqtyrýshysy.
Aıta keteıik, elordalyq klýb pen bolgar mamany arasyndaǵy kelisimshart osy jyldyń sońynda aıaqtalady.