Ekibastuz qalasyndaǵy ortalyq kóshelerdiń birinde Máshhúr Júsip Kópeıulynyń qoladan quıylǵan eskertkishi bóı kótermek, dep habarlaıdy pavlodarnews.kz. Pavlodar oblystyq mádenıet, muraǵattar jáne qujattama basqarmasy mádenıet, óner jáne tarıhı-mádenı murany qorǵaý bóliminiń bas mamany Qaıyrbek Qarǵasekovtyń aıtýynsha, qazirgi kúni konkýrs jarııalanyp, alty eskız qabyldanǵan.
«Bizge Qaraǵandy, Astana, Pavlodar qalalarynyń músinshilerinen alty jumys kelip tústi. Tarıhı músinniń bıiktigi alty metr bolady dep josparlanýda. Ol qoladan quıylýy yqtımal. Jyl sońyna deıin eskertkish Ekibastuz qalasynda turǵyzylmaq, – dedi Qaıyrbek Qarǵasekov.
Búgingi tańda Pavlodar oblysynda 283 eskertkish tirkelgen. Onyń úsheýi - respýblıkalyq mańyzy bar eskertkishter. Bul Pavlodar qalasyndaǵy Derov kópestiń saýda úıi, Aqtoǵaı aýdanyndaǵy Estaı Berkimbaev pen Baıanaýyl aýdanyndaǵy Jaıaý Musanyń zırattary.
«QR Mádenıet jáne sport mınıstrliginiń 2015 jylǵy 2-jeltoqsanyndaǵy 371-buıryǵyna sáıkes bóı kótergen músin bes jyl ótken soń ǵana eskertkishter qataryna qosylady. Pavlodar qalasynda sońǵy jyldary quıylǵan Júsipbek Aımaýytov, Baıan batyr men Malaısary Tarhannyń músinderi eskertkishter tizimine engizilgen joq. Sondaı-aq, biz arnaıy komıssııa quryp, shalǵaıdaǵy eldi mekenderdegi traktordyń, Karl Markstyń, Engels pen Lenınniń músinderin eskertkishter tarapynan syzyp tastadyq», – dep atap ótti bas maman. Aıta keterligi, oblystyq mádenıet basqarmasyna kelip túsken jumystar saraptaýdan ótip, respýblıkalyq komıssııanyń talqylaýyna jiberiledi. Sodan keıin ǵana Máshhúr Júsiptiń eskertishiniń qandaı bolatyny anyqtalady.