QR Aqparat jáne kommýnıkasııalar mınıstri Dáýren Abaev balalardy sýısıdke shaqyratyn kúmándi oıyndarǵa jarnama jasamaýdy ótindi. «Jasóspirimderdi ózine qol jumsaýǵa ıtermeleıtin vırtýaldy oıyndar máselesiniń ózekti bolýy túsinikti, munda balalardyń qaýipsizdigi sóz bolyp otyr. Biraq, atalǵan kúdikti oıyndardy BAQ-tyń qaıta-qaıta eske salýy - kúmándi qaýymdastyqtarǵa jasalǵan jarnama ekenin umytpaǵan jón», - dedi Abaev.
Ol «Verter áseri» uǵymyn atap ótip, sýısıd týraly jańalyqtyń ózektiligi men tanymaldylyǵy ózin-ózi óltirýshiler sanyn arttyryp jiberýi múmkin ekenin aıtyp, mınıstrlik atqaryp jatqan jumystarǵa toqtaldy.
«Bizdiń mınıstrlik sýısıdtik baǵyttaǵy toptardy anyqtaý maqsatynda áleýmettik medıaǵa turaqty túde monıtorıng júrgizip otyrady. Mundaı toptardy buǵattaý jáne jyldam óshirip tastaý máseleleri boıynsha áleýmettik jeliniń menshik ıesimen baılanys ornatylǵan. Nátıjesinde, sońǵy jyldary kúmándi kontenti bar júzdegen toptar joıyldy», dep atap ótti mınıstr. Sonymen birge, D.Abaev QR IIM derekterine súıenip, 2016 jyly jasóspirimderdi ózine qol jumsaýǵa ıtermeleý boıynsha 9 qylmystyq is qozǵalǵanyn, biraq olardyń minez-qulqyna áleýmettik jeliler men toptardyń tıgizgen yqpaly jaıly esh málimettiń joq ekenin basa aıtty.
«О́tken jyly Reseıde balalardyń ózine-ózi qol salýyna vırtýaldy oıyndardy kinálady. Biraq, tergeý barysynda ózin-ózi óltirgen balalardyń eshqandaı kúmándi topqa tirkelmegeni anyqtaldy. Demek, másele óte tereńde, qarym-qatynasta jatyr», - dedi mınıstr. Onyń aıtýynsha, mundaı áleýmettik jaýyzdyqqa qarsy memleket, bilim berý mekemeleri, ata-analar men qalyń jurshylyqtyń birigip kúresýi kerek. Sonymen qatar ol kúdikti paraqshalarǵa kezdeısoq tap bolǵan azamattardy myna silteme boıynsha shaǵym túsirýge shaqyrdy.