Almatyda ótip jatqan qysqy Ýnıversıada oıyndarynda Qazaqstan quramasy 11 altyn, 7 kúmis jáne 17 qolamen jalpy esepte ekinshi orynǵa toqtaldy.
Al 29 altyn, 27 kúmis jáne 15 qola, jalpy sany 71 medal alǵan Reseı quramasy jarysty birinshi orynmen aıaqtady. Úzdik úshtikti Ońtústik Koreıa sportshylary túıindedi. Olardyń enshisinde 11 altyn, 5 kúmis jáne 5 qola medal bar.
El quramasy buǵan deıin 36 medal alyp kórmegen. Osylaısha Ýnıversıada tarıhyndaǵy óz kórsetkishin úsh ese jaqsartty.
Sońǵy ret Ispanııanyń Granada qalasynda ótken jarysta jerlesterimiz bes altyn jáne alty kúmis medal jeńip alǵan bolatyn. Alaıda, bul kórsetkish Almatyda ótken Ýnıversıadanyń tórtinshi kúninde-aq jańaryp úlgerdi. Bul kúni sportshylarymyz alty altyn, eki kúmis jáne jeti qola medal alǵan bolatyn.
Aıta keteıik, Astana ýaqyty boıynsha búgin saǵat 19:00-de qysqy Ýnıversıada oıyndarynyń jabylý saltanaty ótedi.