«Almaty Arenada» HHVIII Dúnıejúzilik qysqy Ýnıversıada saltanatty túrde jabyldy.
«Uly Dala saryny» qoıylymymen daýylpazdar bastaǵan saltanatqa Qazaqstan Respýblıkasynyń Premer-Mınıstri Baqytjan Saǵyntaev, Halyqaralyq stýdentter sport federasııasynyń (FISU) Prezıdenti Oleg Matysın, Almaty qalasynyń ákimi Baýyrjan Baıbek jáne kelesi HHIH Dúnıejúzilik qysqy Ýnıversıadany ótkizýshi Krasnoıarsk qalasynyń meri Edham Akbýlatov jáne basqa da birqatar mártebeli meımandar qatysty.
Almaty Ýnıversıadasyna álemniń 57 elinen 2000-nan astam sportshy kelgen edi. Tikeleı taratylǵan telehabarǵa álemniń 80 eli, mıllıondaǵan kórermen aýdıtorııasy kóz tikti. Barlyǵy 11 kúnge sozylǵan jarysta qysqy sporttyń 12 túrinen 85 medal jıyntyǵy sarapqa salyndy...
Ulttyq maqtanyshymyz – «Ulytaý» saz tobynyń «Jumyr qylysh» kúıi tartylyp, «Almaty Arenadaǵy» saltanat odan ári jalǵasty. Qazaqstan Respýblıkasynyń Ánuranyn jas daryn Áset Balǵazın bastap, Abaı atyndaǵy opera jáne balet teatrynyń hor kapellasy aıaqtady. Ánuran aıaqtalysymen álemniń ár buryshynan Almatyǵa jeńisterge jetý úshin úmitpen kelgen sportshylar sherýge shyqty.
Muz saraıynyń úlken dıspleıinde juldyzy janǵan júldegerlerdiń beınesi kórsetildi. Ýnıversıadanyń shashaýsyz ótken oıyndary men barlyq is-sharalaryna, mádenı demalysyna járdem etken 3000 volonterge rahmet aıtyldy. Alǵys arqalaǵandar arasynda Kanadadan kelgen 78 jastaǵy Maıkl Genrı Hıl men Paralımpııalyq oıyndarǵa qatysýshy, I toptaǵy múgedek Serik Elamanov ta bar.
«Myń boıaýly Almaty» qoıylymynan keıin Qazaqstan Respýblıkasynyń Premer-Mınıstri Baqytjan Saǵyntaevqa sóz berildi.
– Myńjyldyq tarıhy bar Almaty eki apta boıy álemniń sport súıer qaýymynyń kóz tartar ortalyǵyna aınaldy. Osy ýaqyt ishinide, álem Qazaqstandy, Qazaqstan álemdi jańa qyrynan tanydy. Halyqaralyq qaýymdastyq halqymyzdyń tamyry tereń mádenıeti men qanyna bitken qonaqjaılylyǵyn, úzdiksiz damýdyń álemdik básekelestik qaıratyn sezdi. Almaty Ýnıversıadasy álem sportyna ózindik izin qaldyrdy, – dedi Úkimet basshysy. – Dúbirli saltanattyń ashylý rásiminde Elbasy Nursultan Nazarbaev «Sport – beıbitshilik pen tatýlyqtyń yntymaqtastyq pen tilektestiktiń sımvoly. Jer-jahan kóz tikken bul Ýnıversıada naǵyz jastyq jigerdiń alamany, jarqyn jeńisterdiń bastaýy, bolashaq Olımpıada chempıondarynyń mektebi» degen bolatyn. Rasymen de halyqpen halyqty, maqsaty bir jastardy biriktirgen Ýnıversıada eń áýeli shýaqty bas qosý boldy, – degen Baqytjan Saǵyntaev Qazaq eliniń abyroıyn asqaqtatyp, álemniń ár buryshynan kelgen sportshylarǵa, qonaqtarǵa, barsha qaýymǵa alǵysyn qazaq, orys, aǵylshyn tilderinde jetkizdi.
Eki aptanyń ishinde FISU Prezıdenti Oleg Matysın de qazaqshaǵa tóselip qalypty, sózin «Qaıyrly kesh, Almatydan!» bastap, Ýnıversıada tarıhynda erekshe iz qaldyrǵan Almaty Ýnıversıadasynyń barlyq qatysýshylary men eriktilerine, meımandaryna, qala turǵyndaryna zor alǵys aıtty.
Aldaǵy 2019 jylǵy qysqy Ýnıversıada tuńǵysh ret Reseıde, Krasnoıarsk qalasynda ótedi. Ýnıversıada jalaýy túsirilip, Almaty qalasynyń ákimi Baýyrjan Baıbek týdy Krasnoıarsk qalasynyń basshysy Edham Akbýlatovtyń qolyna tapsyrdy.
Osydan soń «Orys qysynyń astanasy» sanalatyn Krasnoıarsk qalasynyń «Haıro» atalatyn taımyr ulttyq ansambli óner kórsetti.
Almatylyqtar qaıta qolǵa alǵan shoý ústinde Ýnıversıadanyń sımvoly –Suńqar-balapan Almatyda jarys kúnderi ot shashqan Ýnıversıada alaýyn óshirdi.
Almatylyqtarmen birge kúlli álemniń barsha Ýnıversıada jarystarynyń jankúıerleri sporttyq saltanatpen qoshtasty.
Almatym sen aman bol, sálem Krasnoıarsk!
Talǵat SÚIINBAI, «Egemen Qazaqstan»
ALMATY.