Elbasy Nursultan Nazarbaevtyń «Qazaqstannyń Úshinshi jańǵyrýy: jahandyq básekege qabilettilik» atty kezekti Joldaýynyń basym baǵyttaryn túsindirý jáne nasıhattaý maqsatynda Parlament Májilisiniń depýtaty Pavel Kazansev Astana qalasy Kásipodaqtar ortalyǵynda bolyp, qalalyq kásipodaqtar ókilderimen kezdesti.
Astana qalasy Kásipodaqtar ortalyǵynyń tóraǵasy Sársenbaı Myńbaev Memleket basshysynyń Joldaýynda jańa jaǵdaıda sala-sala boıynsha qandaı aýqymdy sharalar atqarylýǵa tıis ekenin aıqyndap bergenin aıta otyryp, bul iste kásipodaqtar birlestiginiń de atqarar isiniń biraz ekenin tilge tıek etip, sóz kezegin Parlament depýtatyna usynyp, kópshilikten pikir almasýlaryn, kókeıde túıindelgen suraqtarǵa jaýap alýlaryn aıtyp ótti.
Májilis depýtaty Pavel Kazansev: «Memleket basshysy Nursultan Nazarbaevtyń «Qazaqstannyń Úshinshi jańǵyrýy: jahandyq básekege qabilettilik» atty Joldaýy asa mańyzdy strategııalyq sıpatqa ıe dep aıta alamyz. Álemdik ekonomıkadaǵy jáne memleket ishindegi kúrdeli jaǵdaı kezinde Elbasynyń osy Joldaýyn jahandyq syn-qaterlerge degen ózindik jaýap jáne «Qazaqstan-2050» strategııasynyń maqsaty men mindetterin júzege asyrýǵa arnalǵan júıeli de naqty jospar retinde qarastyrýǵa bolady. Sondyqtan da Qazaqstannyń jańǵyrýdyń jańa kezeńine kóshýi Joldaýdyń negizgi maqsaty bolyp otyr. Al bul iste ózderińizdeı dúıim jurtty biriktirip otyrǵan úlken ujymǵa júkteler jaýapkershilik te aýqymdy» deı kelip, Joldaýdaǵy tehnologııalyq revolıýsııaǵa toqtalyp, bul oraıda Qazaqstannyń kún tártibinde «jasyl ekonomıkany» damytý, básekege qabilettilikti arttyrý mindetteri turǵanyn, osyǵan oraı «Sıfrlyq Qazaqstan» baǵdarlamasyn júzege asyrý baǵytyndaǵy «Qazaqstannyń Ulttyq tehnologııalyq bastamalary» atty jańa damý jospary aıryqsha mańyzǵa ıe ekenin aıtyp ótti.
Sondaı-aq kezdesý barysynda depýtatqa kásipodaq ókilderi tarapynan suraqtar qoıylyp, keı máseleler jóninde óz oı-pikirlerin ortaǵa saldy.
Berik SADYR, «Egemen Qazaqstan»