Premer-Mınıstr Baqytjan Saǵyntaev Almatydaǵy «Alataý» ınnovasııalyq tehnologııalar parkinde bolyp, arnaıy ekonomıkalyq aımaqtyń sońǵy jetistikterimen tanysty. Almaty qalasynyń ákimi Baýyrjan Baıbek mamandar atqaryp jatqan sharýalarmen tanystyrý barysynda, jańalyqtardyń az emes ekenin atap ótti. Máselen, biraz ýaqyt shý bolǵan «Ońaı» kartasyn engizýdiń tolyqtaı júzege asyp bolǵanyn, aldaǵy ýaqytta atalǵan tólem kartasynyń qoldaný kókjıegin keńeıte túsýdi kózdep otyrǵanyn aıtty. Qazirdiń ózinde Shymbulaqqa baratyndar «Ońaı» kartasyn qoldana otyryp, baıaǵydaı uzyn-sonar kezekke turýdan qutylady. Sondaı-aq, tólem kartasyn qoldanýshylarǵa tarıfti tómendetý máselesine de toqtaldy. «Bir retki tólem men karta arqyly tólemniń arasynda aıyrmashylyq bolǵany jón», – deıdi qala ákimi. Úkimet basshysynyń sapary barysynda KBTÝ Teńiz akademııasyna qarasty burǵylaý trenajeriniń ereksheligi tanystyryldy. Mamandardyń aıtýynsha, buryn burǵylaýdy úırený úshin qazaqstandyqtar shet elderge shyǵýǵa májbúr bolatyn. Shet el, árıne, qymbatqa túsedi. Qomaqty qarjy shyǵyndap (1 mln 200 myń AQSh dollary) ornatylǵan burǵylaý oqý-jattyǵý qurylǵysy álemniń keıbir qalalarynda ǵana bar kórinedi. Aqpan aıynyń 14-nen bastap 13 stýdent arnaıy kýrstan ótedi. Alǵashqy túlekter de solar bolmaq. О́z elimizde áldeqaıda arzanǵa túsedi degen bul qural arqyly tájirıbeden ótýdiń bir aptalyq kýrsy – 300 myń teńge. Bir artyqshylyǵy, bul jerden alǵan sertıfıkat álemniń kez kelgen elinde jaramdy bolmaq. Sondaı-aq, Almatynyń kóshelerine ornatylyp jatqan jol qozǵalysyn baqylaıtyn aqyldy kameralar, qarý satatyn dúkenderge ornatylatyn qaýipsizdik dabyl qaǵý tetikteriniń zamanaýı artyqshylyqtary sóz boldy. Mınıstrler Kabınetiniń Tóraǵasy «Alataý» tehnoparkinde ornalasqan aqparattyq jáne elektrondy aspap jasaý, energııanyń jańa kózderin tabý, tabıǵat resýrstaryn tıimdi paıdalaný, munaı-gaz ónimderin óńdeý tehnologııalaryn jetildirý sııaqty salalardy damytýǵa baǵyttalǵan basqa da nysandarmen tanysyp, óz baǵasyn berdi. Almas NÚSIP, «Egemen Qazaqstan» ALMATY