Aqtóbe oblysynyń ákimi Berdibek Saparbaev baǵalardy bilý úshin qala dárihanalaryn zeınetker keıpinde aralady. Satýshylar aımaq basshysyn tanymaǵan. Ákim dárilerdiń baǵasyn kórip júregi ustap qala jazdaǵanyn aıtty. Bul týraly tengrinews.kz habarlaıdy.
Aımaqtaǵy medısınalyq mekemelerdiń esebin tyńdaǵan Berdibek Saparbaev jasalyp jatqan jumystarǵa kóńili tolmaıtynyn bildirdi. Oblys jetekshisi ásirese Medısınalyq jáne farmasevtıkalyq ister komıteti basshysynyń dárilerdiń baǵasy rettelgeni týraly sózine yza boldy.
«Nege ótirik aıtasyz? Eshqandaı da tómen baǵa joq, men ózim tekserdim, dárihanalardy araladym. Bir paıyz da arzandaý joq. Múmkin, sizdiń ózińiz baratyn dárihana bar shyǵar. Men qarapaıym satyp alýshy retinde tekserdim. Baǵalardy kórip júregim ustap qala jazdady. Ár dárihanada qymbat baǵalar týraly shaǵymdanýǵa arnalǵan telefon bolýy tıis. Keı aýdandarda baǵa eki ese ósip ketken. Sondyqtan adamdar aýdannan Aqtóbege kelýge májbúr. Dárige jetem degenshe, adam ólip ketýi múmkin, Qudaı saqtasyn» dedi Saparbaev.
Aımaq basshysy sheneýnikterdiń dárihanalardy ózderi aralap, farmasevterdiń qabyldanǵan memorandým sharttaryn qalaı oryndap jatqanyn teksermeıtinin aıtty. Saparbaev Aqtóbede dárilerdi tómendetilgen baǵamen satatyn arnaıy dárihana ashý máselesin qarastyrýdy usyndy.