Osy maqalany jazbas buryn oblys ortalyǵyndaǵy Dúısenov kóshesi 177 úıde Aqádilovterge arnalǵan memorıaldyq taqta aldyna bardym. Taqtada Otan soǵysyna qatysqan partızan otbasy Jylbek pen Jamal, ortalarynda qyzdary Maııa beınelengen. Sonymen birge, qaladaǵy Dańq alańy memorıaldyq taqtasyna da Aqádilovterdiń esimderin jazyp, kóshe berip, eskertkish ornatsaq degen oı keldi.
Kezinde jazýshy aǵamyz Ádı Sháripovtiń «Partızan qyzy» kitabyn bárimiz de qyzyǵa oqydyq. Povestegi kishkentaı qyz Maııanyń áke-sheshesi Jylbek pen Jamal Aqádilovter Baıanaýyldyń Birlik aýylynda dúnıege kelgen. Jylbek Shymkenttegi Qaplanbek aýylsharýashylyq tehnıkýmyn bitirip, Saryaǵashqa jiberiledi. Sodan soń Kýshka qalasynda jasaqtalǵan 152 atty ásker qataryna alynyp, súıgen jary Jamalmen birge Belorýssııaǵa attanady.
Kenetten soǵys bastalady. Belarýs ormanyndaǵy partızandar qosynynda Maııa 1941 jyldyń 27 qarashasynda ómirge keledi. Jylbek Aqádilov Rýmynııa, Vengrııa, Chehoslovakııa, Avstrııa jerlerin jaýdan azat etýge qatysqan. Soǵystan keıin Jylbek ata qarjy salasynda, Jamal apa tiginshi, al «Partızan qyzy» Maııa ustaz bolyp qyzmet etti. Aqádilovterdiń soǵys kezindegi jaýyngerlik joldary týraly kitap ta bar, kınofılm de bar.
Joǵaryda aıtylǵan eskertkish taqtaǵa keletin bolsaq, marqum Dybysbek Tastenov degen aǵamyz 2003 jyly qalalyq ákimdiktiń esigin tozdyryp júrip, «óz qarajatyńyzǵa jasaı berińiz» degen ruqsattan keıin osy taqta ornatylǵan edi. Soǵys órtin kórgen jandarǵa qalalyq ákimdik osylaı nemquraılyq tanytty.
...О́tken jyldyń kúz aıynda Baıanaýyldyń Toraıǵyr, Birlik, Aqsan aýyldaryna jolsaparmen baryp qaıtqanbyz. Birlikte Aqmektep bólimshesin qosqanda barlyǵy myńǵa jýyq adam qalypty. Mektepte 150 oqýshy bilim alady. Biz kórgenimizdeı, mektep ishi jarqyrap tur, synyptary keń, tap-taza. Aýyl balalarynyń oqyp-bilim alýlaryna barlyq jaǵdaı jasalypty. Aýlasynda jasandy jasyl tósenishteri bar sport alańy bar.
Birliktiń mektebi óńirdegi «Úzdik aýyl mektebi» qataryna alynyp, oqý-bilim salasyndaǵy jetistikterimen alda keledi eken. 2016 jyldyń qarasha aıynda Úkimet qaýlysy shyǵyp, «Birlik jalpy orta bilim berý mektebine» Jylbek Aqádilov esimi berilipti.
«О́li rıza bolmaı, tiri baıymaıdy» degen aýyl turǵyndary J.Aqádilovtiń zıratynyń basyna baryp, belgi ornatyp qaıtypty.
Farıda BYQAI,
«Egemen Qazaqstan»
Pavlodar oblysy,
Baıanaýyl aýdany