Búginde Parlament Májilisinde áıelderdiń úlesi 27 paıyzdy qurap otyr. 2006 jyly bul kórsetkish nebári 10 paıyz ǵana bolatyn. Bul týraly búgin Astanada «Korporatıvtik sektorda áıelderdiń múmkindigin keńeıtý» atty halyqaralyq forýmda QR Memlekettik hatshysy Gúlshara Ábdiqalyqova málimdedi. Onyń aıtýynsha, Búkilálemdik ekonomıkalyq forýmnyń málimetteri kórsetkendeı, 2016 jyly Qazaqstan áıelderdiń parlamenttegi úlesi boıynsha 144 eldiń ishinde 48-oryndy ıelenip otyr. Shaǵyn jáne orta bıznestiń belsendi bóliginiń 44 paıyzyn áıelder basqarady. Olar shaǵyn jáne orta bıznes salasynda jumys oryndarynyń 31 paıyzyn qamtamasyz etýde.
«Qazaqstan Respýblıkasy táýelsizdik alǵaly beri eldiń barsha azamattary úshin barlyq salada quqyqtaryn teń etý boıynsha kezeń-kezeńmen jumystar atqaryp keledi. Biz 2006-2016 jyldarǵa arnalǵan genderlik teńdik baǵytyndaǵy strategııany sátti júzege asyrdyq. Beıjiń platformasy palatasynyń maqsattary aıasynda áıelderdiń el damýyndaǵy úlesin keminde 30 paıyzǵa jetkizý maqsatyn oryndadyq», - dedi Memhatshy.
Gúlshara Ábdiqalyqovanyń aıtýynsha, áıelder bıznesi memlekettik baǵdarlamalardyń negizinde, Úkimet pen halyqaralyq damý ınstıtýttary, EQDB, BUU Damý Baǵdarlamasy, Dúnıejúzilik bank jáne ózge de uıymdarmen kelisimi negizinde damytylýda. Sonymen qatar «QazAgro» holdıngi aýyl áıelderi arasynda kásipkerlikti damytýdy qolǵa alýda. Sońǵy 3 jylda holdıng nesıeleriniń 32 paıyzy áıelderge berilgen. «Osynyń arqasynda Qazaqstan Dúnıejúzilik ekonomıkalyq forýmy áıelderdiń ekonomıkadaǵy úlesi men belsendiligi reıtıngisinde 31-orynǵa jaıǵasty», - dep atap ótti Ábdiqalyqova.