Grekııa respýblıkasy EKSPO-2017 kórmesine qatysý shartyna qol qoıdy, dep habarlady EKSPO-2017 komıssarynyń hatshylyǵy.
2017 jylǵy 9-10 aqpanda EKSPO-2017 kórmesiniń komıssary Rápil Joshybaev Afınyǵa jumys saparymen bardy. Sapar aıasynda qorshaǵan orta jáne energetıka mınıstri Georgıos Statakıspen, Ekonomıka jáne damý mınıstrliginiń bas hatshysy - Grekııa ulttyq seksııa komıssary Ilıas Ksanfakospen, sondaı-aq Grekııanyń iri «Enterprise Greece» ulttyq agenttiginiń tóraǵasy Hrıstos Staıkospen kezdesti. Komıssar grekııalyq bıznesti halyqaralyq IT-startaptar tehnoparki qurylatyn kórme nysandarynyń múmkindikterin paıdalanýǵa shaqyrdy.
Grekııa energetıka mınıstri óz kezeginde Grekııa kórmege halyqaralyq ekologııalyq standarttarǵa sáıkes energetıkalyq ınfraqurylymdarǵa naqty úlgiler usynýǵa nıetti ekenin habarlady. Jerorta teńizi eli jańǵyrtylatyn energııa kózderine baılanysty máselelerde eleýli tájirıbesi bar, ásirese kún energııasyn paıdalaný kórsetkishi 20 paıyzdy quraıdy. Sondaı-aq Grekııa JEK úlesin 2020 jylǵa deıin 30 paıyzǵa arttyrýdy josparlaýda. Kezdesý qorytyndysy boıynsha Joshybaev pen Ksanfakos kórmege qatysý shartyna qol qoıdy.