Astanada jumys saparymen júrgen Birikken Ulttar Uıymy Bas hatshysynyń orynbasary, BUU Damý baǵdarlamasy Eýropa men TMD elderi boıynsha О́ńirlik Bıýrosynyń dırektory, BUU EKSPO-2017 halyqaralyq mamandandyrylǵan kórmesiniń Bas Komıssary Jıhan Sultanoǵlý hanym búgin Túrki akademııasy halyqaralyq uıymyna (TWESCO) arnaıy keldi.
Mártebeli meımandy qarsy alǵan TWESCO basshysy Darhan Qydyráli uıymnyń qyzmeti men mıssııasy jaıly keńinen tanystyrdy. Akademııanyń halyqaralyq baılanystary men ǵylymı jobalary, jarııalaǵan eńbekterimen birge keleshektegi josparlary jóninde mol maǵlumat berdi. Ekijaqty kezdesýge sonymen qatar, Túrki memleketteri aqsaqaldar keńesiniń múshesi Ádil Ahmetov, BUUDB-nyń Qazaqstandaǵy Turaqty О́kiliniń Orynbasary Mýnhtýıa Altangerel, Qazaqstandaǵy BUUDB departament basshylary Irına Gorıýnova men Dana Amanova qatysty.
TWESCO kitaphanasy men Túrki tarıhy mýzeıimen tanysqan Jıhan Sultanoǵlý hanym Akademııanyń qyzmetin jáne Túrki dúnıesiniń ıntegrasııasyn nyǵaıtyp, damytýdaǵy úlesin joǵary baǵalady. Akademııa basshysy tartý etken qundy kitaptardy, onyń ishinde jýyrda ǵana tusaýy kesilgen «Joıylý qaýpindegi túrki tilderi» tórt tomdyǵyn zor yqylaspen qabyl alyp, kóptomdyqtyń ǵylymı mańyzy zor dep atap ótti. Keleli kezdesý sońynda Jıhan Sultanoǵlý hanym Akademııanyń Tilek kitabyna jyly lebizin jazyp qaldyrdy.
Aıta ketý kerek, BUU Bas hatshysynyń orynbasary J.Sultanoǵlý 2016 jyly TWESCO-nyń Nıý-Iorktegi BUU Bas keńsesinde ótkizgen «2030 Jospary úshin Jibek Joly boıyndaǵy sınergııa» atty halyqaralyq sımpozıým jumysyna arnaıy qatysyp, jıynnyń joǵary deńgeıde ótýine qoldaý kórsetken bolatyn.