Áýesqoı boks
Roýshı Ýorren 2004 jyly 48 kılo salmaq dárejesinde Afına Olımpıadasyna qatysty, biraq irikteý kezeńinen óte almady. Alaıda, ol kezde Ýorren 17 jasta bolatyn. Kelesi jyly Qytaıda ótken álem birinshiligine 51 kg salmaqta qatysyp, qola júldege qol jetkizdi. 2007 jyly Chıkagoda dál osy salmaqta álem chempıony atandy. 2011 jyly úshinshi ret qatarynan álem chempıonatyna qatysqan ol qola júldeger atandy. Azdy-kópti biraz tájirıbe jınaǵanmen, Ýorrenniń Olımpıada oıyndarynda joly bola qoımady. 2008 jyly Beıjińde 51 kelide baǵyn synaǵan ol alǵashqy kezdesýlerdiń birinde jeńildi. Al 2012 jyly Londonda 52 kelide shyǵyp, tek 9-orynnan ǵana kórindi.Kásipqoı boks
London Olımpıadasynan keıin ol kásipqoı rıngte baǵyn synaýǵa den qoıdy. Sol jyly qarasha aıynda Lýıs Rıveramen sharshy alańǵa shyǵyp, tóreshilerdiń sheshimimen alǵashqy jeńisine qol jetkizdi. Araǵa bir aı salyp, Devıd Reıespen kúsh synasady. Tartysty ótken kezdesýde Ýorren odan da basym tústi. Roýshı úshin ásirese, 2013-2014 jyldar sátti boldy. Osy ýaqyt aralyǵynda bas-aıaǵy 11 márte rıngke shyǵyp, bárin de jeńiske jetti. 2015 jyly alǵashqy tıtýldy jekpe-jegin ótkizdi. 2 tamyzda domınıkandyq Hýan Karlos Paıanomen WBA (Super) jáne IBO nusqasy boıynsha vakantty belbeýleri úshin judyryqtasady. Buǵan deıin qos boksshy da eshkimnen jeńilip kórmegen-di. Degenmen, Roýshı Ýorren dál osy tusta upaı sany boıynsha ese jiberip aldy. Qarymta kezdesý 2016 jyldyń 18 maýsymynda ótti. Bul kezdesýde Roýshı jeńdi. Sóıtip, osy kúni sarapqa salynǵan WBA (Super) jáne IBO belbeýleriniń jańa ıesi atandy. Aıta keteıik, WBA nusqasynyń ýaqytsha chempıony bolǵandyqtan, qazaqstandyq boksshy – amerıkalyqtyń ıeligindegi belbeýlerdiń mindetti úmitkeri. Aıqas búgin Ýorrenniń týyp-ósken jeri Ogaıo shtatynda ótedi. Bir qyzyǵy, Jaqııanov búginge deıin Amerıkada jekpe-jek ótkizip kórmegen. Naqtyraq aıtqanda, Qazaqstan, Monako, Bolgarııa, Avstralııa, Belarýs, Anglııa, Soltústik Irlandııa, Gonkong, Shveısarııa, О́zbekstan, Taıland jáne Reseı jerinde judyryqtasqan bolatyn. Al Roýshı 15 kezdesýiniń bárin óz elinde ótkizgen. Bul aıqasty nazarynan tys qaldyrmaǵan býkmekerlik keńseler birer aı buryn qos boksshyǵa arnalǵan koeffısıentterdi jarııalady. Bul kórsetkish boıynsha Ýorren favorıt sanalyp otyr. Bás tigetinder úshin amerıkalyqtyń jeńisine 1.20-1.25, qazaqstandyqtyń jeńisine 4.00-4.30 koeffısıent berdi. Kezdesýdiń jeńimpazy toǵyzynshy raýndtan keıin anyqtalady degen de boljam bar. Osy jerde «Jaqııanovpen salystyrǵanda eki esedeı az kezdesý ótkizse de, sarapshylar ne sebepti Ýorrendi favorıt sanaıdy?» – deıtin oıdyń týatyny zańdy. Oǵan birneshe sebep bolsa kerek. Birinshiden, amerıkalyq boksshy bul jekpe-jegin de týǵan jerinde ótkizedi. Tıisinshe, zaldaǵy barlyq jankúıerdiń qoldaýyna ıe bolady. Ekinshiden, bul aıqasqa Ýorrenniń eki birdeı belbeýi qoıylmaq. Árıne, Paıanomen eki ret kezdesip baryp, áreń degende jetken tıtýldarynan ońaı aıyrylmasy anyq. Úshinshiden, qos boksshynyń arasyndaǵy jas aıyrmashylyǵy. Ýorren Jaqııanovtan tórt jas kishi. Boks úshin naǵyz pisken shaǵynda. Tórtinshiden, Jaqııanov sońǵy jekpe-jegin 2015 jyldyń qarasha aıynda venesýelalyq Ionfrez Parehoǵa qarsy ótkizgen. Búginge deıin jaraqatyna baılanysty sharshy alańǵa shyǵa almaı keldi. Onyń ústine uzaq úzilisten keıin tıtýldy urysqa shyǵý kimge bolsyn ońaı tımesi anyq. Statıstıka Jaqııanovty búgin aýyr aıqas kútip turǵanyn kórsetedi. Alaıda, Janat ta ońaı shaǵylatyn jańǵaq emes. Ol buǵan deıin 28 kezdesý ótkizip, tek bireýinde ǵana qarsylasyna ese jibergen. Jattyqtyrýshysy – kásipqoı boks juldyzdarynyń biri Rıkkı Hatton. Muny da Janattyń úlken artyqshylyǵy dep sanaýǵa bolady. Aıan Ábdýálı, "Egemen Qazaqstan"