QR Densaýlyq saqtaý mınıstri Eljan Birtanovtyń tóraǵalyǵymen densaýlyq saqtaý salasynda kásipkerlikti damytýǵa kedergi bolyp otyrǵan shekteýlerdi joıý máselesine arnalǵan keńes ótti, dep habarlaıdy QazAqparat.
Elbasy Nursultan Nazarbaevtyń 2017 jylǵy 31 qańtaryndaǵy Joldaýynda bıznestiń aldynda turǵan kedergilerdi joıý týraly tapsyrma bergen bolatyn. Memleket basshysy báskelestikti arttyrý úshin mindetti áleýmettik medısınalyq saqtandyrý aıasynda jeke medısınalyq mekemelerge memlekettik uıymdarmen bir deńgeıde múmkindik jasaý kerektigin atap ótken bolatyn.
Qazaqstandaǵy 901 aýrýhananyń 161-i, 3149 ambýlatorlyq-emhanalyq mekemeniń 941-i jeke menshikte. Medısınalyq qyzmetke aqy tóleý komıtetiniń málimeti boıynsha, 2016 jyly 288 kommersııalyq medısınalyq uıym kepildendirilgen tegin medısınalyq qyzmet aýqymy aıasynda jumys istegen. Bul memlekettik tapsyrystyń 28 paıyzy. Mindetti áleýmettik medısınalyq saqtandyrý aıasynda jeke sektorǵa halyqqa memlekettik tapsyrys aıasynda da, saqtandyrý aıasynda da medısınalyq qyzmet kórsetýge múmkindik berý qarastyrylǵan. О́z kezeginde azamattarǵa medısınalyq mekemeni tańdaý quqyǵy beriledi. Bul medısınalyq qyzmetter naryǵyndaǵy básekeni kúsheıtip, onyń sapasyn kóterýi tıis.
Densaýlyq saqtaý mınıstrligi men Qazaqstandyq jeke medısınalyq qurylymdar qaýymdastyǵy birlesip júrgizgen saraptama barysynda, densaýlyq saqtaý salasynda kásipkerlikti damytýǵa qolbaılaý bolyp otyrǵan eń mańyzdy kedergiler anyqtaldy. Mysaly, medısınalyq mekemelerdiń ǵımarattaryndaǵy bólmelerdiń aýqymyna qoıylatyn talaptar tym joǵary. Bul álemdik tájirıbege saı emes, ári shyǵyndardyń negizsiz ósýine yqpal etedi. Bir-birine qaıshy keletin quqyqtyq normatıvtik aktiler de az emes. Jınalǵan usynystar densaýlyq saqtaý salasyndaǵy ákimshilik kedergilerdi joıýǵa arnalǵan sharalardy jasaqtaý barysynda eskeriledi. Bul úshin Densaýlyq saqtaýdy damytý respýblkalyq ortalyǵynyń janynan zańgerler men densaýlyq saqtaý uıymdastyrýshylarynan turatyn qurylym jasaqtaldy. Ol Úkimetten, medısınalyq qaýymdastyqtan, bıznes ókilderinen túsken usynystardy júzege asyrýmen aınalysady.
«Medısınalyq mekemelerdiń jumysyn retteıtin quqyqtyq-normatıvtik aktilerge túbegeıli saraptama jasalyp, qaıta qaralýy tıis memlekettik fýnksııalar anyqtalady. Kadrlardyń sanyn retteý, medısınalyq qyzmet pen dári-dármekke qoljetimdilik, sıfrlyq medısına, medısınalyq qyzmettiń kórsetilý tártibi, sapasy men qaýipsizdigi, memlekettik-jeke áriptestikti damytý, sanıtarlyq-epıdemıologııalyq qyzmet salalaryndaǵy ákimshilik-quqyqtyq kedergilerdi múmkindiginshe azaıtý josparlanyp otyr», – dep atap ótti Densaýlyq saqtaýdy damytý respýblıkalyq ortalyǵy bas dırektorynyń mindetin atqarýshy Aınur Aıyphanova.
Qazaqstandyq jeke medısınalyq qurylymdar qaýymdastyǵynyń tóraǵasy Gúlnár О́tepovanyń aıtýynsha, sanıtarlyq-epıdemıologııalyq salanyń jumysyn retteıtin quqyqtyq-normatıvtik aktilerdi, sanıtarlyq jáne qurylystyq erejeler men normalardy qaıta qaraý kerek. Onyń pikirinshe, quqyqtyq bazadaǵy qaıshylyqtar men memlekettik organdar jumysynyń úılesimsizdigi jeke sektordyń damýyna kedergi jasap otyr.
Otyrysqa densaýlyq saqtaý mınıstrligi komıtetteri men departamentteriniń basshylary, Ulttyq ekonomıka mınıstrliginiń, Kásipkerlerdiń «Atameken» ulttyq palatasynyń, medısına jáne farmasevtıka salasyndaǵy iri bıznes-qaýymdastyqtar, álemdik banktiń jobalarǵa qoldaý jasaý tobynyń, halyqaralyq konsaltıngtik, úkimettik emes uıymdardyń ókilderi qatysty.