Elordada qala ákimdiginiń bastamasymen «Belsendi azamat» keń kólemdi aksııasynyń ekinshi kezeńi ótti, oǵan 2462 adam qatysty. Bul týraly Astana ákimdiginiń baspasóz qyzmeti habarlady.
Uıymdastyrýshylardyń málimetterine sáıkes, shara barysynda azamattardan túrli salalar boıynsha 2500-den asa aýyzsha ótinish túsken, al jazbasha ótinishterdiń sany 1702-ge jetti. Kúni boıy quzyrly qurylymdar men vedomstvolardyń mamandary elordalyqtardy alańdatqan suraqtarǵa jaýap berip, shaǵymdar men ótinishterin qabyldady, túrli máseleler boıynsha keńester berdi. Sharanyń uıymdastyrýshylary qoıylǵan saýaldardyń deni turǵyn úı, úlestik qurylys, jumyspen qamtý jáne jumysqa ornalastyrý máselelerine qatysty bolǵanyn aıtady.
Eske salsaq, halyqpen keri baılanystyń tıimdiligin arttyrýǵa baǵyttalǵan «Belsendi azamat» aksııasynyń birinshi kezeńi ústimizdegi jyldyń 26 qańtarynda ótkizilgen. Sharanyń ekinshi kezeńiniń qorytyndysy boıynsha júrgizilgen monıtorıngke sáıkes, halyq tarapynan zor qyzyǵýshylyq baıqalǵan. Sol sebepti qala bıligi aksııany júıeli negizde ótkizip turmaq.