«Qaırat» fýtbol klýbynyń burynǵy oıynshysy Anatolıı Tımoshýk resmı túrde fýtbolshylyq ǵumyryn aıaqtady. Bul týraly eurosport.ru habarlady.
«Fýtbolshy retinde jańa komanda izdemeımin. Mansabymdy aıaqtap, jańa qyzmetke ornalasar aldynda azdap úzilis alý týraly sheshim qabyldadym. Qazir jattyqtyrýshylyq jumys boıynsha birneshe usynys túsip jatyr. Endi jastarǵa jón kórsetip, jınaǵan tájirıbelerimmen bólisemin», – dedi Tımoshýk.
Aıta keteıik, mansabyn 1995 jyly Lýskiniń «Volyn» komandasynan bastaǵan ol 1998 jyly Doneskiniń «Shahterine» aýysyp keldi. Bul klýbta 2007 jylǵa deıin oınap, úsh márte el chempıony atanǵan. Dál osy jyly mansabyn Reseıdiń «Zenıt» komandasynda jalǵastyrdy. Sank-Peterbýrg ujymymen eki dúrkin chempıon atansa, 2008 jyly ÝEFA Kýbogy men ÝEFA Sýperkýbogynda jeńiske jetken. 2009-2013 jyldary Germanııanyń «Bavarııa» klýbynda oınaǵan. Býndeslıganyń eki dúrkin chempıony atanyp, bir ret Chempıondar lıgasynda jeńiske jetken.
Al «Qaırat» klýbymen 2015 jyldyń shilde aıynda kelisimshartqa otyrady. Osy ýaqyt aralyǵynda el Kýbogy men Sýperkýbogyna qol jetkizgen.