Juma kúni Úkimette ótken Prezıdenttiń «Qazaqstannyń Úshinshi jańǵyrýy: jahandyq básekege qabilettilik» Joldaýyna arnalǵan brıfıngke Mádenıet jáne sport vıse-mınıstri Aqtoty Raıymqulova, Qazaq Ulttyq О́ner ýnıversıtetiniń rektory Aıman Musaqojaeva, Sport jáne dene shynyqtyrý isteri komıtetiniń tóraǵasy Elsııar Qanaǵatov, sondaı-aq jýyrda ǵana Almaty qalasynda ótken qysqy Ýnıversıada oıyndarynyń jeńimpazdary qatysty.
Mádenıet jáne sport vıse-mınıstri Elbasy Joldaýyndaǵy basymdyqtar sheńberinde mınıstrlik Mádenı saıasat tujyrymdamasyn, Sportty damytý tujyrymdamasyn, Tilderdi damytý men qoldanýdyń memlekettik baǵdarlamasyn iske asyratynyn jetkizdi. Sondaı-aq, Mádenıet jáne sport mınıstrliginiń basym mindetteriniń tiziminde dýaldy bilim berýdi iske asyrý mindeti bar.
«Shyǵarmashylyq adamdary bala kezden bilim berý júıesine shyǵarmashylyq sabaqtary qosylǵan arnaıy ortada tárbıelense, keıin joǵarǵy jetistikke qol jetkizedi. Dýaldy bilimniń bir oshaǵy retinde Astanada ashylǵan Horeografııa akademııasyn ataýǵa bolady. Munda birinshi synyptan doktorantýraǵa deıin oqytylady. Biz sol oqý ornynda bolashaq balet juldyzdaryn, álemdik dárejedegi juldyzdardy kóptep oqytamyz, tárbıeleımiz degen senimdemiz», dedi A.Raıymqulova. Vıse-mınıstr mınıstrlik birinshi kezekte Qazaqstannyń jas mádenıet qaıratkerlerine, sportshylaryna qoldaý kórsetý mindetin qoıatynyn habarlady. Osyndaı qoldaýdyń jarqyn mysaly retinde qazirgi kezde Qytaıdaǵy «I am a singer» halyqaralyq baıqaýyna qatysyp jatqan Dımash Qudaıbergendi atady.
Brıfıngte sóz alǵan Qazaq Ulttyq О́ner ýnıversıtetiniń rektory Aıman Musaqojaeva elimizdiń osy ýaqytqa deıin jetken jetistikteriniń negizinde adam kapıtaly men mamandardyń áleýeti turǵanyn aıtty. Elbasy Joldaýynda kórsetilgen synı oılaýdy, aqparattyq tehnologııalardy damytý máseleleri de ózekti ekenine toqtaldy. «Bizdiń mamandar aqparattyq tehnologııany da qoldana alýy kerek. Aǵylshyn tilinde de sóıleı bilýi tıis. Úsh tildi meńgerý týraly tapsyrma óz ýaqytynda berilip otyr dep oılaımyn. Biz shet elderge gastrolderge shyǵyp júrmiz. Sonda tildi bilmeýshilik problema týǵyzady», dedi Aıman Musaqojaeva. Al Sport jáne dene shynyqtyrý isteri komıtetiniń tóraǵasy Elsııar Qanaǵatov qysqy Ýnıversıada oıyndary tóńireginde áńgimeledi. Bıylǵy stýdentterdiń dúnıejúzilik oıyndarynyń qorytyndysy boıynsha Qazaqstan quramasy jalpy komandalyq esepte ekinshi orynǵa taban tiregeni belgili. Bul oraıda E.Qanaǵatov árbir sport jarysynda burynǵy ótken jarystardaǵy kórsetkishterden joǵary nátıje kórsetý mindeti qoıylatynyn aıtty.
Brıfıng sońynda BAQ ókilderi qysqy Ýnıversıada oıyndarynyń jeńimpazdarymen suraq-jaýap túrinde pikir alysty.
Aıgúl SEIILOVA,
«Egemen Qazaqstan»