Májilis depýtaty Ekaterına Nıkıtınskaıa Elbasy N.Á.Nazarbaevtyń «Qazaqstannyń Úshinshi jańǵyrýy: jahandyq básekege qabilettilik» atty Qazaqstan halqyna Joldaýyn talqylaý maqsatynda Almaty qalasyndaǵy Túrksib aýdanyna qarasty №83 mektep-gımnazııa ujymymen kezdesti.
Kezdesýde sóz sóılegen Parlament Májilisiniń depýtaty, «Aq jol» fraksııasynyń múshesi E.Nıkıtınskaıa Joldaýdyń mán-mańyzy men ereksheligin kópshilikke keńinen túsindirip, onda kórsetilgen bes basymdyqtyń árqaısysyna jeke-jeke toqtaldy. Ásirese, ol bilim alýdyń qoljetimdiligin qamtamasyz etý máselelerine erekshe nazar aýdaryp, jan-jaqty taldap berdi.
Halyq qalaýlysy, ásirese, mańyzdy salalardyń biri bolyp tabylatyn bilim berý máselesin tereńnen sóz etti.
«Memleket basshysy Joldaýynyń tórtinshi basymdyǵy adamı kapıtal sapasyn jaqsartýǵa arnalǵan. Bul – bilim berý, densaýlyq saqtaý, áleýmettik qamsyzdandyrý salalaryn damytý jónindegi júıeli kózqaras. Ekonomıkalyq ósýdiń jańa modelinde bilim berý ortalyq býynǵa aınalýǵa tıis. Birinshiden, oqý baǵdarlamalaryn jańǵyrtý, ıaǵnı «synı oılaý qabiletin jáne óz betimen izdený daǵdylaryn damytý, IT-bilimdi, qarjylyq saýattylyqty qalyptastyrý» jóninde mindet qoıylyp otyr. Qazir mazmuny jańartylǵan oqý baǵdarlamalary men oqýlyqtaryn, sondaı-aq bilim alýshylardyń oqý jetistikterin ólshemshartpen baǵalaý júıesin kezeń-kezeńmen baıqap kórý jumysy aıaqtaldy», – dedi depýtat.
Suhbat túrinde ótken kezdesý barysynda oqý ornynyń ustazdary kókeılerinde júrgen saýaldaryn qoıyp, tushymdy jaýaptar aldy. Sonymen qatar, Joldaýda kórsetilgen mindetterge oraı óz usynystaryn da bildirdi. Al depýtat mańyzdy qujatta júktelip otyrǵan jaýapkershilikti tereń sezinýge jáne onyń oryndalýyna birge atsalysýǵa shaqyrdy.
Talǵat SÚIINBAI,
«Egemen Qazaqstan»
ALMATY