Juma kúni Qaraǵandyda Bas prokýror Jaqyp Asanovtyń tóraǵalyǵymen kóshpeli alqa otyrysy ótti. Jıyn respýblıka kóleminde feısbýk áleýmettik jelisi arqyly tikeleı kórsetilim arqyly júrdi. Bas prokýratýra elde qalypty bıznes ortany qurý boıynsha ótkizilip jatqan jumystardyń nátıjelerimen bólisti. Sondaı-aq, bıznesti qorǵaý jónindegi jol kartasyn oryndaýdyń aldaǵy nátıjelerin talqylady.
Jıynda 2016 jyldyń 14 maýsymynda ótken «Kásipkerlik salasyndaǵy prokýratýra qadaǵalaýy» forýmynda usynylǵan birqatar máseleler boıynsha jol kartasyn iske asyrý nátıjeleri men bıznes úshin neǵurlym ózekti bolyp tabylatyn túıtkildi máselelerdi sheshý joldary aıtyldy.
Alqa otyrysynyń jumysyna Qaraǵandy oblysy ákimi Nurmuhambet Ábdibekov, ortalyq jáne jergilikti memlekettik organdardyń, «Atameken» UKP-nyń, bıznes-qaýymdastyqtardyń jáne kásipkerlikti qorǵaý jónindegi ókildikterdiń ókilderi qatysty.
Bas prokýror Jaqyp Asanov «Biz Qaraǵandy oblysyndaǵy shaǵyn jáne orta bıznestiń jaǵdaıyn zerdeleıik dep sheshtik. О́ńir tosynnan tańdalyp otyrǵan joq. Bul iri ónerkásiptik nysan, ınfraqurylymy damyǵan. Qaraǵandy oblysynda 85 myń shaǵyn jáne orta bıznes sýbektisi tirkelgen. Onda 225 myń adam eńbek etýde. Sondyqtan, munda qyzmetkerlerimizdi Bas prokýratýra turǵysynan jaǵdaıdy zerdeleý úshin jibergen edik. Nátıjesinde, quqyq qorǵaý organdary men prokýratýra bızneske qylmystyq qysym jasaǵan zańsyz áreketterdi anyqtadyq. Bıznesmenderdiń ústinen qylmystyq is tirkep, bıznesti qylmystyq proseske tartqan. Bul salyq qyzmetteriniń, sanıtarlyq qadaǵalaý qyzmetteriniń tekserýi emes. Bul – tolyqqandy qylmystyq is. Al qylmystyq is aıasynda tintý de, shekteý de, májbúrleý de, tutqyndaý da júrgizýge bolady. Sondyqtan, biz ekonomıkalyq qylmystardy tirkeý erejesin ózgerttik. О́tken jyldyń ekinshi jartyjyldyǵynda mundaı ister eki esege azaıdy», dedi.
– Atalǵan kóshpeli májilistiń eń negizgi maqsaty – kásipkerlikti qoldaý, olarǵa qolaıly jaǵdaı týǵyzý. Máselen, birinshi jartyjyldyqta kásipkerlerge qatysty alty myńnan asa qylmystyq is tirkelse, ekinshi jartyjyldyqta biz qoldanǵan sharalar nátıjesinde ony on ese tómendetýge jaǵdaı týǵyzdyq. Elbasynyń tapsyrmasyna sáıkes, aldaǵy ýaqytta 61 ókiletti organdy tekseretin bolamyz. Biz joqqa shyǵaryp otyrǵan talaptar tek bızneske kedergi keltirip qana qoımaı, Sybaılas jemqorlyqqa keń jol ashýy ábden yqtımal. Sol sharalardyń aldyn alýymyz kerek, – dedi Bas prokýrordyń orynbasary Marat Ahmetjanov ta óz kezeginde.
Jıyn barysynda málim bolǵandaı, ekonomıkalyq qylmystardy qozǵaýdaǵy birqatar ustanymdar ózgertilmek.
Otyrysta sondaı-aq, ókilettik organdardyń, aýmaqtyq organdardyń jumystaryndaǵy kemshilikter atalyp ótti. Qaraǵandy oblysy prokýratýrasyn synǵa alǵan tusta, kásipkerlerdi qylmystyq proseske zańsyz tartý faktileri anyqtalǵany belgili boldy. Máselen, elý jas shamasyndaǵy kásipker Dolgomyslov myrzany prokýratýra zańsyz jaýapqa tartqan. Tekseris kezinde ETQ qyzmetkeri Ábdirahmanov ÝUI-ge ornalastyrý úshin kásipkerge ádeıi alaıaqtyq aıyp taqqany anyqtalady. Qorytyndysynda, prokýratýra qylmys quramynyń bolmaýyna baılanysty isti toqtatqan. Negizsiz jalanyń kesirinen kásipker aýyr soqqy alǵan. Otbasymen ajyrasyp, densaýlyǵy syr bergen.
Bas prokýror atap ótkendeı, 2017 jyldyń 1 shildesinen bastap kásipkerler fıskaldarmen bolyp jatatyn daýlardy sotta daýsyz jáne úlken shyǵyndarsyz sheshe alatyn bolady. Bul úshin salyq jáne keden daýlary boıynsha sotqa deıingi appelıasııa ınstıtýty qurylypty. Sondaı-aq, jospardan tys tekserister de budan bylaı azaımaq.
Bas prokýratýranyń saıtynda arnaıy formýlıar bar. Onda kásipkerler bıznestiń damýyna kedergi keltiretin normalardy kórsete alady. Osy kúnge deıin bıznes ókilderinen 58 usynys kelip túsken. Onyń otyz birin bas prokýratýra qoldap otyr. Bul siltemeler «Atameken» UKP, sondaı-aq «Nur Otan» partııasynyń barlyq óńirlik saıttarynda qoljetimdi.
Jıyndy qorytyndylaı kelgende, J.Asanov myrza IT-tehnologııasyn odan ári damytýdyń mańyzdylyǵyn erekshe atap ótti. Elbasy Nursultan Nazarbaevtyń jańa Joldaýynan týyndaıtyn basty baǵyttar men baǵdarlardy negizge ala otyryp, bıznesti damytý, salyq zańnamasyn jeńildetý, baqylaý men qadaǵalaý qyzmetterin aýqymdy tekserý syndy birqatar jumystar boıynsha tıisti oryndarǵa tapsyrmalar júktedi.
Mıras ASAN,
«Egemen Qazaqstan»
QARAǴANDY