Nıderland Syrtqy ister mınıstrliginde osy eldiń EKSPO-2017 halyqaralyq mamandandyrylǵan kórmege qatysýy qarsańynda arnaıy ınternet-saıttyń resmı tusaýkeser rásimi ótti. Bul ınternet-resýrs Nıderlandtaǵy Saýda jáne ınvestısııalar jónindegi ulttyq agenttiktiń elektrondyq portalynyń bazasy negizinde daıyndalǵan, dep habarlady Qazaqstan Respýblıkasy Syrtqy ister mınıstrliginiń baspasóz qyzmeti.
Saıtta eń alǵash ret Nıderlandtyń EKSPO-2017 kórmesine arnalǵan logotıpi men «Low Land, High Energy» degen jazýy bar urany (slogan) tanystyrylǵan. Osy arqyly nıderlandtyqtar balamaly energetıka salasyndaǵy ozyq tehnologııalar men ınnovasııalardy ázirleýdegi óz jetistikterin kórsetýge tyrysqan. Internet paıdalanýshylary saıttan nıderlandtyqtardyń EKSPO-2017-ge qoıylatyn ulttyq pavılony týraly aqparattardy, is-sharalar baǵdarlamasyn, sondaı-aq, Qazaqstan týraly paıdaly málimetterdi taba alady.
Máselen, saıttyń Qazaqstanda bıznesti júzege asyrý» taqyrybyndaǵy bóliminde Astanadaǵy kórme gollandııalyq kásipkerlerge balamaly energetıka, aýyl sharýashylyǵy, «jasyl» tehnologııalar men ınnovasııalar sekildi salalarda iskerlik baılanystardy jaqsartýǵa úlken múmkindik beretini aıtylǵan.
Sonymen qatar, bul elde stýdentterge – «jańashyldardyń bolashaq býynymen» jumys júrgizýge de aıryqsha kóńil bólingen. Bul rette, Nıderland delegasııasy EKSPO kórmesi kezinde gollandııalyq jáne qazaqstandyq stýdentter arasynda bilim jóninen tájirıbe almasýǵa baǵyttalǵan «Innovation Challenge» aksııasyn ótkizýdi kózdep otyr.
Atalǵan saıttyń resmı túrde ashylý rásiminiń aldynda Qazaqstannyń Nıderlandtaǵy elshisi Maǵjan Ilııasov Nıderlandtyń Ulttyq komıssary Hans Drıssermen kezdesti. Kezdesý barysynda Nıderlandtyń EKSPO-ǵa jáne 22-23 aqpan kúnderi Astanada ótetin Halyqaralyq komıssarlar jınalysyna qatysýyna daıyndyq barysy talqylandy.
Sonymen qatar, qos tarap Nıderlandta EKSPO-2017-ge arnalǵan resmı saıttyń ashylýy Astanada ótetin halyqaralyq kórmege qatysýshylar men qonaqtardy kóptep tartýǵa sep bolatyndyǵyna senim bildirýde.