Toqsanynshy jyldardyń basynda Sholpan juldyzdaı jarqyrap shyqqan bul topty búgingi jastardyń kópshiligi bilmeýi de múmkin. Biraq sol kezdegi aǵa býyn ókilderi olardyń áýelete shyrqaǵan ánderin áli kúnge umytqan joq. Saǵynady, izdeıdi. Bul «Jeruıyq» ansambli edi. Kezinde ónerimen Shyǵys óńirin ǵana emes, kúlli Qazaqstandy tánti etken ansambl músheleri qazir qaıda júr?
...80-jyldardyń aıaq kezinde Zaısanda júrgen Marat Qondybaev, Esbol Kırchıbaev, Baýyrjan Zeınesh, Qanat Zakarıanov syndy júregi óner dep soqqan jigitter bir kúni Katonqaraǵaıǵa toıǵa barady. Sol saparda aýdannyń sol tustaǵy basshysy Janymqan Qundyzbaevpen kezdesip, ónerge janashyr azamat sol jerde ónerpaz jigitterge «quda» túsip, sonda qalýlaryn ótinipti. Sodan ne kerek, tórteýi táýekelge bel býyp Altaıǵa keledi, jumyspen, baspanamen qamtylady.
– Katonqaraǵaı jer jánnatyndaı kórindi maǵan. Sóıtip, tabıǵatymen baılanystyryp, tobymyzdy «Jeruıyq» dep ataýdy jón kórdik, – dep eske alady sol shaqtardy sazger Marat Qondybaev.
Osylaısha, 1989 jyly «Jeruıyq» toby óner álemine jol tartady. Áýeli Katonqaraǵaıda tusaýkeser konsertterin ótkizip, 1990 jyly О́skemende uıymdastyrylǵan «Vostok» atty án baıqaýyna qatysady. Sahnaǵa 15 mınýttyq «Nevada-Semeı» mýzykalyq kompozısııasyn alyp shyqqan top músheleri qazylar alqasyn tánti etip, 1-oryndy ıelenedi. Budan soń Pavlodarda ótken respýblıkalyq baıqaýda top jarady.
– Sóıtip, tobymyz óńirge ǵana emes, Qazaqstanǵa tanyla bastady. «Qarııalar», «Saǵynysh», «Alash», «Qurbym-aı» syndy ánderimiz sol kezdiń hıtine aınaldy. 1990 jyly «Azııa daýysy» festıvaline ótinish jiberdik. Alǵashynda mýzykalyq aspaptarda oınaýymyz túsiniksiz dep qabyldaı qoımady. Stılimiz túsiniksiz bolǵan kórinedi. О́ıtkeni, bizdiki etnofolk pop edi, – deıdi toptyń burynǵy múshesi Baýyrjan Zeınesh.
Arada azdaǵan ýaqyt ótkennen keıin Almatydan «Azııa daýysyna» shaqyrtý keledi. Án baıqaýyna Qytaı, О́zbekstan, Úndistan, Taıland, Sıngapýr, Ýkraına memleketteriniń ónerpazdarymen qatar, bizdiń elden «Assalaýmaleıkým» atty top qatysady.
Katonqaraǵaıdan kelgen jigitter áýeli Esbol Kırchıbaevtyń «Alash» ánin, odan soń «Qaratorǵaıdy» akapellamen oryndaıdy. Tórt jigittiń mereıi bul baıqaýda da ústem bolyp, halyqaralyq óner básekesinde 3-oryndy ıelenedi. Shalǵaıdaǵy alys aýdannan kelip, Alataý baýraıyn dúr silkindirgen ónerpaz jigitterdi festıvaldan keıin Roza Rymbaeva men Tasqyn Oqapov arnaıy kelip quttyqtap, izgi tilekterin aıtady. Aıtyp qana qoımaıdy, Almatyda qalý jóninde usynys bildiredi. «Qazaqkonsertke» jumysqa shaqyrady. Alaıda, top músheleri týǵan jerlerine qaıtýǵa asyǵady.
Toqsanynshy jyldary Shyǵys jurtyn ǵana emes, kúlli Qazaqstandy ónerimen moıyndatqan top múieleri búginde elimizdiń ár aımaǵynda tirshilik keship jatyr. «Jeruıyq» tobyna jetekshilik etken Marat Qondybaev Astanada sazgerlikpen aınalysyp júrse, Qanat Zakarıanov pen Esbol Kırchıbaev Almatyda turyp jatqan kórinedi. Toptyń taǵy bir múshesi Baýyrjan Zeınesh О́skemende teatrda mýzykant bolyp qyzmet atqarady.
Azamat QASYM,
«Egemen Qazaqstan»
О́SKEMEN