Búgin túnde Los-Anjeles qalasynda (AQSh) úzdik ánshilerdi, kompozıtorlardy, aqyndar men prodıýserlerdi anyqtaıtyn bedeldi «Gremmı» syılyǵyn tabystaý rásimi ótti, dep jazady QazAqparat.
Bıyl birden tórt «Gremmı» syılyǵyna 2016 jyly qaıtys bolǵan brıtandyq rok-ánshi Devıd Boýı laıyq dep tanyldy. Boýıdyń sońǵy "Blackstar" plastınkasy «Úzdik alternatıvti albom» jáne «Klassıkalyq emes albomnyń úzdik ınjınırıngi» nomınasııalary boıynsha jeńiske jetti. Sonymen birge, Boýı «Úzdik rok oryndaýshy» jáne «Úzdik rok-kompozısııa» sanattarynda da top jardy. «Albomdy úzdik bezendirý» músinshesi de "Blackstar" muqabasyn ázirlegen dızaıner Djonatan Barnbrýkke berildi. Dástúrli sharanyń taǵy bir júldegeri - brıtandyq ánshi Adel. Ol «Úzdik vokaldyq pop-albom» ("25") jáne «Úzdik jeke pop-oryndaý» ("Hello" áni úshin) nomınasııalarynda jeńimpaz dep tanyldy.
Belgili ánshi Beıonse "Formation" ánine túsirgen beınebaıany úshin «Úzdik mýzykalyq vıdeo» júldesin aldy. Sondaı-aq Chance the Rapper esimimen tanymal hıp-hop oryndaýshy Chanselor Djonatan Bennett «Úzdik jas ánshi» ataǵyna laıyq dep tanyldy. Ol 1993 jyly Chıkago qalasynda dúnıege kelgen. Amerıkalyq prodıýser Greg Kerstıng «Jyldyń úzdik prodıýseri» atandy. Ol Adel («Hello»), Sıa (Chandelier), Kellı Klarkson syndy ataqty ánshilerge prodıýserlik etken jáne keıbir ánderiniń birlesken avtory bolǵan.
Budan bólek, «Gremmı» syılyǵy pop, rok, aspap, kantrı, alternatıv, R&B, rep, latıno, djaz baǵyttary boıynsha úzdik dep tabylǵan óner ıelerine de tabystaldy. Jyl saıynǵy júldeni taǵaıyndaý ıdeıasyn kásibı mýzykanttar 1957 jyly Los-Andjeleste kóterdi. Ol kezde Tomas Edısonnyń grammofondy oılap tapqanyna 80 jyl tolýy atap ótilgen edi. Júldeniń ataýy («Gremmı») men músinshe formasynyń (altyn jalatylǵan grammofon) grammofonǵa uqsaıtyny da sondyqtan.