Memleket basshysy Nursultan Nazarbaev keshe jumys saparymen Aqmola oblysynda boldy. Elbasy oblys aktıvimen óńirdiń áleýmettik-ekonomıkalyq damý máseleleri jóninde keńes ótkizdi.
Elbasy kezdesýge qatysýshylarǵa jergilikti máslıhattyń kezekten tys sessııasynda kandıdatýrasy maquldanǵan oblystyń jańa ákimi Málik Myrzalındi tanystyrdy.
Qazaqstan Prezıdenti oblys aktıvine arnaǵan sózinde birqatar kórsetkishter boıynsha, atap aıtqanda, ónerkásip, aýyl sharýashylyǵy ónimderin óndirý, ınvestısııalar tartý kólemi, sondaı-aq turǵyn úı qurylysy jóninen óńir ekonomıkasy damı túskenin aıtty.
– Aýqymdy úsh daǵdarysty bastan ótkersek te, elimizdegi turaqtylyqty saqtap qaldyq jáne ári qaraı damyp kelemiz. Ekonomıkalyq qıyndyqtardy eńserýge múmkindik beretin ulttyq qor jınaqtaı aldyq. Endi aldymyzda álemniń damyǵan 30 eliniń qataryna qosylý maqsatyna qol jetkizý úshin «Qazaqstannyń Úshinshi jańǵyrýy: jahandyq básekege qabilettilik» atty Joldaýdy iske asyrý aıasyndaǵy jańa mindetter tur, – dedi Nursultan Nazarbaev.
Elbasy álemniń jańa naqty ahýaly jaǵdaıynda tehnologııalar qarqyndy damyp kele jatqanyn atap ótip, Joldaýda kórsetilgen mindetterdi iske asyrý úshin jańa bilim men tásilderdi qoldaný qajettigine nazar aýdardy.
Memleket basshysy ındýstrııalandyrý baǵdarlamalaryn júzege asyrýdyń, óńir jáne búkil respýblıka boıynsha ınfraqurylymdy damytýdyń mańyzdylyǵyna toqtaldy.
– Taıaý jyldary Qazaqstanda 7 myń shaqyrym avtomobıl joldary salynatyn bolady. О́ńirlerdiń barlyǵy joǵary sapaly magıstraldar arqyly baılanysady. Olar balalarymyz ben nemerelerimiz úshin máńgilikke qalady. Sondaı-aq, áýejaılar qalpyna keltirilýde. Kaspııde 2 teńiz porty salynýda. Elimizde júzege asyrylyp jatqan barlyq baǵdarlamalar jańasha tásilderdi qoldanýdy qajet etedi, – dedi Qazaqstan Prezıdenti.
Sondaı-aq, Nursultan Nazarbaev M.Myrzalınge oblystyń aýyl sharýashylyǵy sektoryn odan ári damytýǵa qatysty birqatar mindet júktedi. Atap aıtqanda, Memleket basshysy aýyl sharýashylyǵy kooperatıvin qurý, ǵylymı áleýetti paıdalaný arqyly ónimdilikti arttyryp, aýyl sharýashylyǵyna shaǵyn nesıe bólý, shaǵyn jáne orta bıznesti jandandyrý arqyly agroónerkásip keshenin damytýdyń mańyzdylyǵyn aıtty.
Elbasy aldaǵy EKSPO-2017 halyqaralyq kórmesi aıasynda paıdalanylatyn oblystyń týrıstik áleýetin erekshe atap ótti.
Sońynda Qazaqstan Prezıdenti qatysýshylarǵa bıyl astyqtyń mol bolýyn tilep, kóktemgi egis jumystarynda tabysqa jetýlerine nıettestik bildirdi.
Aqmola oblysy Astana qalasyna jaqyn jatqandyqtan, ári elordanyń azyq-túlik beldeýin qamtamasyz etip otyrǵan strategııalyq mańyzdy óńir bolǵandyqtan Elbasy ákim etip ábden ysylǵan mamandy taǵaıyndap otyr dep oı túıýge negiz bar.
Asqar TURAPBAIULY,
«Egemen Qazaqstan»
Aqmola oblysy
Sýret Prezıdenttiń baspasóz qyzmetinen alyndy