Qaraǵandy oblysynda jedel járdemniń biryńǵaı dıspetcherlik qyzmeti jobasy qolǵa alyndy. Bul týraly oblystyq densaýlyq saqtaý basqarmasynyń basshysy Erjan Nurlybaev málim etti.
Vedomstvo basshysy elektrondy densaýlyq saqtaýdy damytýdyń qadamdaryna toqtaldy.
– 2017 jyldyń qańtarynan bastap oblystyq aýrýhanalarda «Stasıonar» densaýlyq saqtaýdyń keshendi medısınalyq aqparattyq júıesiniń jańa modýli engizilýde. Joba jeltoqsanǵa qaraı aıaqtalady. Osylaısha, barlyq medısınalyq uıymdar biryńǵaı aqparattyq alańda jumys isteıdi, bul elektrondy densaýlyq saqtaý tólqujatyn sátti engizý men mindetti áleýmettik medısınalyq saqtandyrý jaǵdaıynda jumys isteýge kóshý úshin negiz bolady. Kelesi qadam jedel járdemniń biryńǵaı dıspetcherlik qyzmetin qurý bolady, – dedi E.Nurlybaev.
Iаǵnı, barlyq shaqyrýlar biryńǵaı aqparattyq júıege engiziledi. Jedel járdem mashınalary GPS-navıgatorlarmen jabdyqtalady. Bıýdjetten 36 reanomobıl satyp alýǵa 1,2 mlrd teńge bólinbek.
Sonymen qatar E.Nurlybaev Qaraǵandyda jedel járdemniń jańa úsh shaǵyn stansasyn salý týraly sheshim qabyldanǵanyn jetkizdi. 2017 jyly jobalaý-smetalyq qujattar ázirleýge qarjy bólinip, qurylysty 2018 jyly bastaý kózdelgen.
«Eki shaǵyn stansanyń biri Maıqudyq aýmaǵynda, ekinshisi Suryptaý kentine ornalasady. Atalǵan jobany júzege asyrý shuǵyl kómekti jaqsartýǵa múmkindik beredi, dep atap ótti oblystyq densaýlyq saqtaý basqarmasynyń basshysy.
Mıras ASAN,
«Egemen Qazaqstan»
QARAǴANDY