15 naýryz kúni Nıderlandta parlamenttik saılaý ótti. Aldyn ala málimetter boıynsha, qazirgi premer-mınıstr Mark Rıýtteniń ońshyl lıberaldyq Azattyq jáne demokratııa úshin halyq partııasy jeńiske jetti, dep jazady VVS.
NOS Nıderland ulttyq teleradıokompanııasynyń tapsyrysymen jasalǵan esep boıynsha, Rıýtte basqaratyn Azattyq jáne demokratııa úshin halyq partııasy parlamenttegi 150 orynnyń 31 mandatyn ıelenedi. Al olardyń basty qarsylastary - ýltraońshyldar, Gert Vılderstiń Azattyq partııasy 19 mandatty ıelendi. Osyǵan oraı Gert Vılders "Biz 19 nemese 20 mandat alýymyz múmkin. Bul men kútkendeı nátıje emes. Degenmen, bizdiń jeńimpazdar qatarynan kóringenimiz de jaqsy nátıje", dedi. Al qazirgi premer-mınıstr Mark Rıýtte Nıderland halqy "qaýipti popýlızmge" qarsy daýys bergenin aıtty.
Osy synǵa óz pikirin bildirgen Vılders "Onyń neni meńzep turǵanyn túsinbedim. Ol (Rıýtte - red.) jaqsy jáne jaman popýlızm bolatynyn aıtty. Meni ekinshi qatarǵa qosty. Men ózimdi popýlıstpin dep eseptemeımin", dedi.
Vılders saılaýaldy kampanııasynda Donald Tramptyń lozýngterin jıi qoldanǵandyqtan "popýlıst" atanyp ketken bolatyn.
Bir aıta keterligi, Rıýtteniń jeńisin Germanııa men Fransııa jaqsy qabyldady. Germanııa kansleri Angela Merkel apparatynyń basshysy Peter Altmaıer Tvıtter paraqshasynda "Nıderland! Sizder chempıonsyzdar! Saılaýdyń keremet nátıjesi qutty bolsyn", dep jazdy. Al Fransııanyń Syrtqy ister mınıstri Jan-Jaq Eıro "Ásire ońshyldardyń kóterilýine jol bermegen gollandyqtardy quttyqtaımyn", dep jazdy.
Jalpy, Nıderland parlamentine ótetin partııa sany kóp bolǵandyqtan, memlekettik úkimette 100 jyldan astam ýaqyt boıy koalısııalar qurylady. Al saılaý bastalmas buryn memlekettegi barlyq partııalar Vılderspen koalısııa qurýdan bas tartqan bolatyn.
Saılaýda úshinshi orynda 16 depýtat mandatyn ıelengen Rıýtteniń basqarýshy koalısııasynyń seriktesteri - «Jasyl solshyldar» tursa, 14 mandaty bar Sosıalısttik partııa tórtinshi oryn aldy.
Bıyl saılaýǵa halyqtyń 81 %-y qatysqan. 2012 jyly bul kórsetkish 73 % bolǵan.
Saılaýdyń resmı qorytyndysy birneshe saǵattan keıin belgili bolady.