Kaspıı teńizi jaǵalaýynda ornalasqan Oımasha polıgonyna Qazaqstannyń ártúrli garnızondarynan qarý-jaraq pen áskerı tehnıka tıelgen eshelondar keldi. Munda Qazaqstannyń batysynda qyrkúıek aıynyń sońǵy dekadasynda iri kólemdi birlesken «Ortalyq-2011» strategııalyq jattyǵýy ótedi.
Qazaqstandaǵy polıgonda ótetin jattyǵýmen qosa, Reseı Federasııasynyń Astrahan oblysyndaǵy Ashýlýk polıgonynda da áskerlerdiń is-qımyldary júzege asyrylady. Qazaqstan men Reseı áskerı kontıngentterimen bir sapta belarýs jáne ýkraın bólimsheleri de jattyǵýdyń atalǵan kezeńine qatysatyn bolady.
«Ortalyq-2011» jattyǵýyna Qazaqstan, Reseı, Belorýssııa, Tájikstan, Qyrǵyzstan jáne Ýkraına qarýly kúshteriniń basqarý organdary men quralymdary jáne bólimderi tartylǵan. Al ol tórt eldiń aýmaǵynda ótedi: Ashýlýk pen Oımasha polıgondarynan basqa oqý-jattyǵý qımyldary Qyrǵyzstannyń Podgornoe jáne Tájikstannyń Lıaýr polıgondarynda jalǵasyn tappaq. Atalǵan eki memlekette «Ortalyq-2011» strategııalyq jattyǵýy sheńberinde UQShU Jedel áreket etý ujymdyq kúshteri men Ortalyq Azııa aýmaǵynyń Jedel óristetý ujymdyq kúshteri quramy bólimderiniń tartylýymen jattyǵýlar ótkiziledi. Qazaqstan Qarýly Kúshteri jattyǵýlardyń barlyǵyna da tartylyp, óz úlesterin qosady.
Jattyǵýǵa basshylyq Reseı Federasııasy Qarýly Kúshteri Ortalyq áskerı okrýginiń shtaby ornalasqan Ekaterınbýrg qalasynan jasalady. Birikken shtabtyń quramyna kiretin qazaqstandyq jedel basqarý tobynyń ofıserlerin Shtabtar bastyqtary komıteti tóraǵasynyń orynbasary general-maıor Muqan Dúısekeev basqarady, dep habarlady QR QM baspasóz qyzmeti.