Ońtústik Qazaqstan oblysynda osy jyly oblys ákimdiginiń qoldaýymen «Kıeli Qazyǵurt», «Kúsh atasy – Qajymuqan», «Otyrardy qorǵaý» atty 3 anımasııalyq fılm túsiriledi, dep habarlady OQO ákiminiń baspasóz qyzmeti.
Bul týraly oblys ákimi J.Túımebaev Naýryz merekesine arnalǵan is-sharalar aptalyǵynyń «Ulttyq óner» kúnine oraı, kıno stýdııalardyń jumysymen tanysý barysynda málim etti.
Osy kúni aımaq basshysy «Ońtústikfılm» mekemesinde bolyp, shyǵarmashylyq ujymǵa shaǵyn avtobýs tabys etip, aldaǵy ýaqytta óńirdegi barlyq óner ujymdaryna osy syndy kólik syıǵa tartý josparlanyp otyrǵanyn jetkizdi.
О́ńirde kıno salasyn damytýǵa atsalysyp júrgen 9 jeke stýdııa bar. Olardyń ishinde 4 kınostýdııa - «Saq», «Jaıdarman», «Meıram», «Kóz tımesin» production» ortalyqtarynyń kıno túsirýge múmkindigi mol.
Munan soń, ákim týyndylarymen álemdik deńgeıdegi mamandardy moıyndatyp úlgergen óner ortalyǵy - «SAQ» kınostýdııasynyń jumysymen tanysyp, stýdııa dırektory, rejısser Nýrıddın Patteevke shyǵarmashylyq shyńdalý jolyndaǵy jetistikterimen quttyqtap, oblys ákiminiń Alǵys hatymen marapattady.
Aıta keteıik, joǵaryda atalǵan 3 fılmdi anımasııalyq janrda eńbek etetin jalǵyz stýdııa – «Saq» kınostýdııasy túsiretin bolady. Sonymen qatar, stýdııa jetekshiligi ákim sapary kezinde oblys týrızmin nasıhattaıtyn «Kóne jetigenniń syry» atty telehıkaıa ssenarııin usyndy. Tarıhı taǵylymy mol, tabıǵaty tamasha Ońtústik Qazaqstan oblysy týraly jan-jaqty dáripteýge arnalǵan serıaldy óńir basshysy oń baǵalap, qoldaý bildirdi.
Búginde «Saq» kınostýdııasynyń qorynda 51 anımasııalyq fılm bar. Qurylǵanyna bıyl 15 jyl tolǵan shyǵarmashylyq ujymda 40 anımasııa mamany jumys isteıdi.
Jaqynda ǵana kınostýdııa ázirlegen týyndylardyń ishindegi «Qazaq eli» tolyqmetrajdy anımasııalyq fılmi Egıpettegi Kaır qalasynda ótken «XX Halyqaralyq anımasııalyq fılmderdiń forýmyna» qatysyp, «Eń úzdik tolyqmetrajdy fılm» júldesine jáne «Úzdik rejıssýra», «Úzdik mýzyka» nomınasııalaryna ıe bolyp, oblysymyzdy Halyqaralyq deńgeıde búkil dúıim jurtshylyqqa tanytty.