Ońtústikte Naýryz merekesine baılanysty «Naýryz-dýman» aptalyǵy bastalyp ketti. Shymkenttegi temir jol beketiniń túbinen jaryp shyǵyp, qalany kókteı ótetin Qoshqar ata ózeni boıynda tamasha demalys aımaǵy bar.
21 naýryzǵa deıin túzilgen merekelik sharanyń alǵashqy kúnine oblystyq Qazaqstan halqy Assambleıasy uıytqy bolyp, óńirdegi etnomádenı birlestikter ulttyq taǵamdaryn kópshilikke usyndy. Ár etnomádenı birlestik naýryzkójeden dám tatqyzdy.
– Bul merekeniń kún men túnniń teńelip, ulystyń uly kúni bolýymen qatar, ulttar dostyǵyn nyǵaıtýdaǵy orny erek, – deıdi oblystyq Assambleıa hatshylyǵynyń meńgerýshisi Muratáli Halmuradov. –Halyq aýzynda «myń siz-bizden bir shyj-byj artyq» degen sóz bar. Ortaq dastarqan, merekelik kóńil kúı, ár ult pen ulystyń konserttik baǵdarlamasy barshany bir úıdiń balasyndaı etip jiberedi. Bárine Qazaqstandaı qýatty memlekettiń perzenti ekendigin uqtyrady.
Osyndaı kúıdegi áńgimelerdiń aýanyn etnomádenı birlestikterdiń tóraǵalarynan da uǵyndyq.
Naýryz aptalyǵy kún saıyn osyndaı yrys-berekege bas biriktiretin jańa leppen atalyp ótýde.
Baqtııar TAIJAN,
«Egemen Qazaqstan»
Ońtústik Qazaqstan oblysy