Tommıdiń tasy órge domalady

Tórt kúnge sozylǵan VII halyqaralyq «Kazakhstan Open» golf týrnıri óz máresine jetti. Álemniń ár túkpirinen ımek taıaǵyn syǵymdaı ustap jetken 130 sportshynyń ishinen bul joly aǵylshyn jigiti Tommı Flıtvýdtyń juldyzy jandy. 64 myń eýrony qan­jy­ǵasyna baılaǵan jıyrma jastaǵy jas oıynshy óziniń sporttaǵy mártebesin taǵy bir satyǵa bıiktetip, Eýropa tórinde ótetin European Tour golf týrnırine qatysý joldamasyna ıe bolyp qana qoımaı, otanyna abyroımen attandy. Úshinshi raýndtan keıin jo­ǵa­ry kórsetkishpen alǵa ozǵan úsh seri – Tommı Flıtvýd, Knýt Bor­she jáne Saımon Tornton­nyń arasynda aqtyq saıys úshin qulash sermeý básekesi qyzý ór­bidi. Oıyqqa shar salýdyń al­ǵash­qy raýndynan sońǵy on segizinshi raýndqa deıin oıyn ta­ma­shalaýshy jurttyń nazary da osy úsheýinde bolǵan edi. Talaı halyqaralyq jarystarda oza shaý­yp júrgen kánigi golfshiler Alataýdyń baýraıyndaǵy «Nur­taý» klýbynyń jasyl alańynda óte tartymdy oıyn órnegin kór­setkenimen, aǵylshyn balasyn alǵa ozdyryp, birinen soń biri saptan shyǵyp qala berdi. Al­ǵashqy aınalymda ımek taıaǵyn ıyqqa ilip shyqqandardyń ishinde tórt birdeı jerlesimiz bar. О́tken joly sóz etken myqty­larymyz da bul dodada qulashyn keńge jaıa almady. On segizinshi raýndta aǵyl­shyn Tommı men norveg Knýt Bor­shem bas báıge úshin baq sy­nap, Borshemniń bir ǵana qate soq­qysy Flıtvýdtyń baǵyn as­yr­dy. Tommı 273 soqqy, al Knýt 275 soqqy jasady. Ekinshi oryn­ǵa norvegııalyq sportshy taban tiredi. Al ırland Saımon Tornton men nemis Bernd Rıtthammer 276 soqqymen úshinshi orynǵa ekeýlep jetti. Ádettegideı je­ńim­pazben bolǵan baspasóz más­lı­hatynda Tommı Flıtvýd golf oınaýdy on jasynan bas­taǵanyn, ustazy ári rýhanı demeýshisi bolyp júrgen ákesi birge kelip, qazaq kógalynda da úl­ken dem bergendigin aıtty. Jeńimpazdar men osy týrnırge atsalysqan otandyq kom­pa­nııalardy Qazaqstan Golf fe­derasııasynyń prezıdenti Nur­­­taı Ábiqaev baǵaly syı­lyq­tar­men marapattady. European challenge tour eý­ro­palyq dodasyna bastaıtyn «Ka­zakhstan Open-2011» týrnırin Al­maty qalalyq ákimdiginiń qol­­daýymen Qazaqstan Golf fe­derasııasy «Nurtau» golf klý­bynda uıymdastyrdy. Qanat ESKENDIR. Almaty. ––––––––––––––––– Sýretti túsirgen Bersinbek SÁRSENOV.