Keshe Parlament Senatynyń Tóraǵasy Qaırat Mámı Qytaı Halyq Respýblıkasynyń Qazaqstandaǵy Tótenshe jáne ókiletti elshisi Chjoý Lıdi qabyldady, dep habarlady Parlament Senatynyń baspasóz qyzmeti.
Kezdesý barysynda Qazaqstan men Qytaıdyń ekijaqty, onyń ishinde parlamentaralyq is-qımyl deńgeıindegi qatynastardy odan ári nyǵaıtý máseleleri talqylandy.
Q.Mámı Qazaqstan men Qytaı arasyndaǵy qatynastardyń qarqyndy damyp kele jatqanyn jáne strategııalyq áriptestik senimdiliktiń joǵary dárejesimen sıpattalatynyn atap ótti.
– Bizdiń elderimiz arasyndaǵy yntymaqtastyqty damytýdaǵy jáne ony nyǵaıtýdaǵy negizgi ról eki memleket basshylary N.Nazarbaev pen Hý Szıntaoǵa tıesili, – dedi Senat Tóraǵasy.
Parlament Senaty Tóraǵasynyń shaqyrýy boıynsha bıylǵy 23-28 qyrkúıek aralyǵynda Halyq ókilderi Búkilqytaı jınalysy Turaqty komıtetiniń Tóraǵasy Ý Bango Qazaqstanǵa resmı saparmen alǵash ret keledi.
– Biz Qytaıdyń joǵary ókildi organy basshysynyń aldaǵy saparyna erekshe mańyz beremiz, – dedi Q.Mámı jáne ol Ý Bangonyń bizdiń elimizge kelýi tek parlamentaralyq únqatysýdy belsendilendirýge ǵana emes, memleketaralyq qatynastardyń barlyq baǵyttaryn nyǵaıtýǵa járdemdesetinin de atap ótti.
Q.Mámıge qytaılyq áriptesi Ý Bangonyń sálemin jetkizgen Chjoý Lı eki memleket arasyndaǵy strategııalyq áriptestikti odan ári nyǵaıtýdy jaqtaıtynyn aıtty.
Qytaı dıplomaty Qazaqstan men Qytaıdyń ekijaqty qatynastary týraly Q.Mámıdiń bergen baǵasymen kelise otyryp, Qazaqstan men Qytaı arasyndaǵy strategııalyq áriptestiktegi tabystar joǵary deńgeıdegi turaqty jáne nátıjeli baılanystarǵa negizdeletinin málimdedi.