Memleket qaıratkeriniń mereıtoıy kele jatyr

Árbir eljandy azamat Dinmuhamed Ahmetuly Qonaevtyń esimin erekshe iltıpatpen ataıdy. Dımekeńdeı dara tulǵanyń qazaq úshin orny bólek. Endeshe, elý jyl el aǵasy atanǵan qazaqtyń birtýar ulynyń ǵasyrlyq mereıtoıy da óz deńgeıinde atap ótilýi tıis. Bul – Elbasynyń tujyrymy. Osy máselege oraı, keshe Qa­zaqstan Respýblıkasy Prezı­denti­niń Alma­ty­daǵy rezıden­sııa­synda Memlekettik hatshy Qanat Saýdabaev D.A.Qonaev atyn­daǵy halyq­ara­lyq qordyń basshylarymen kezdesti. Keńesip pishken ton kelte bolmas degendeı, oılasý tur­ǵy­synda ótken basqosýǵa D.A.Qo­naev qorynyń qurmetti prezıdenti Sultan Jıenbaev, vıse-prezıdenti Keńes Aýhadıev, Bas­qarma músheleri Jannat Asqa­rova, Bolysbek Battalhanov, Alma­ty qalasynyń ákimi Ahmetjan Esimov jáne Prezıdent Ákimshi­li­gi­ Ishki saıasat bóliminiń meń­ge­rýshisi Darhan Myńbaı qatysty. Kil jaqsylarmen ótken kezdesýdi asha otyryp Qanat Saýdabaev: – Elbasy Nursultan Nazar­baev­tyń Dinmuhamed Ahmetuly Qonaevtyń týǵanynyń 100 jyl­dy­ǵyna daıyndyq pen ony ót­kizýdi laıyqty uıymdastyrý tý­raly tapsyrmasyna sáıkes, biz búgin atqarylǵan jumystardyń nátıjesin qarap, aldaǵy me­reı­toıǵa deıin qalǵan ýaqytta sheshilýi qajet máselelerdi talqylaýǵa tıispiz. Búgingi kezdesýdiń qory­tyn­dysy boıynsha Memleket basshysynyń tapsyrmasyn tikeleı iske asyrý jóninde tıisti sheshimder qabyldanatyn bolady, – dedi. Al Qonaevtaı dara tulǵanyń ǵasyrlyq toıy 2012 jyldyń  12 qańtarynda Abaı atyndaǵy Qa­zaq memlekettik akademııalyq ope­ra jáne balet teatrynda ótetin saltanatty jıynnan bastaý almaq. Memleket qaırat­keri­niń ónegeli ǵumyry mereıtoılyq jyl aıasynda jan-jaqty ulyq­ta­lyp, keler urpaq aldynda uıal­maı­tyndaı nasıhattalýy úshin qazirdiń ózinde birqatar sharalar qolǵa alyna bastaǵan. Halyqaralyq qordyń basshy­lary mereıtoıǵa daıyndyq ju­my­synyń barysy týraly habardar ete kelip, qordyń Memleket basshysynyń qamqorlyǵyn ár­daıym sezinip otyrǵanyn erekshe atap ótti. Máselen, Qazaqstan Pre­zıdentiniń 1994 jyldyń 24 aqpanyndaǵy «D.A.Qonaevtyń atyn máńgi este qaldyrý týraly» qaýlysyna sáıkes, Almaty qala­synda murajaı úıi, Shymkent qalasynda murajaıy ashylǵany belgili. D.A.Qonaevtyń esimi óndiris oryndaryna, oqý oryndary men ǵylymı-zertteý ortalyqtaryna, Astana, Almaty jáne elimizdiń basqa da qalalaryndaǵy dańǵyl­dar men kóshelerge berildi. Osy arada Eýrazııa keńis­ti­gin­degi birde-bir elde burynǵy bas­shy­laryna memlekettik deńgeıde mundaı mýzeı jasaqtalmaǵanyn aıta ketýge bolady. Bul jerde jeke menshik qorlar men mura­jaı­lar týraly áńgime bólek. Aldymen Qanat Saýdabaev kez­desýge qatysýshylarmen birge D.A.Qonaev halyqaralyq qory­nyń  ákimshilik ǵımaratymen jáne murajaı úıiniń jumy­sy­men egjeı-tegjeıli tanysyp shyq­qanyn aıta ketelik. Sondaı-aq, kezdesý barysynda kórnekti memleket qaıratkeriniń turǵan úıin de mýzeıge aınaldyrý kerektigi jóninde uıǵarym jasaldy. Memlekettik hatshymen kezdesý barysynda D.Qonaevtyń 100 jyl­dyǵyn atap ótýge qatysty bas­qa da kóptegen máseleler tal­qylanyp, keleli usynystar  aı­tyldy. So­nyń ishinde el aǵa­sy­nyń esimin ózi elimizde irgetasyn qalaýǵa yqpal etken qalalardyń birine berý jóninde usynys bildirildi. Ǵıbratty ǵumyr ıesiniń me­reı­toıyna arnap albomdar,   fı­lm­der men syıkádeler jasaý da oı­lastyryldy. Taý tulǵanyń ta­ǵy­lymdy ómiri jastarǵa úlgi bolýy úshin mundaı sharalar legi sal­ta­nat­ty jıynmen ǵana shektelmeıdi. Aınash ESALI. --------------------------------- Sýretti túsirgen Aıtjan SALYQULY.