Ádemi kóńil-kúıdi keıde bazar narqy buzatyny bar ǵoı. Samsaǵan azyq-túlikke qaltańdaǵy qarjyń jetińkiremese qorlyq degen sol. Biraq, jetisýlyq óndiristik kooperatıvter men sharýa qojalyqtarynyń ujymdary baryn shahar tutynýshylarymen bólisýdi jyl saıyn ádetke aınaldyryp, kómekterin aıamaýda. Aǵymdaǵy jyly da Almaty men Taldyqorǵan, Qapshaǵaı, Tekeli qalalarynda alǵashqy aýyl sharýashylyǵy taýarlarynyń jármeńkesi jalǵasyn tapty. Almatylyqtar Jambyl, Eńbekshiqazaq, Ile, Qarasaı, Raıymbek, Talǵar, Uıǵyr aýdandaryna belgilengen oryndardaǵy sórelerde tórt túliktiń eti men maıyna, sút, kókónis jáne basqa da azyq-túlikke toltyrdy. Osy kúngi jármeńkede azyq-túliktiń otyzdan astam túrleri saýdalanyp, 11075,6 myń teńgeniń ónimderi satyldy. Osyndaı saýda Qapshaǵaıda da jalǵasty.
Tekeli shaharyndaǵy qaıta óńdeý kásiporyndary men qala aýmaǵyndaǵy kókónis ósiretin aýylsharýashylyq qurylymdary, jeke sharýa qojalyqtary tutynýshy talǵamynan shyǵa bildi. Qysqa tosap daıyndaıtyndar bazar baǵasynan arzan kókónisti arqalap jatty. Osylaısha atalǵan qalalarda ótken alǵashqy kúzgi jármeńke joǵary deńgeıde uıymdastyrylǵanyna kóz jetti.
Oblys ákimdigi, oblystyq aýyl sharýashylyǵy, ónerkásip jáne kásipkerlik salalarynyń basshylary men aýdan ákimderi jármeńkelerdegi baǵanyń, saýda mádenıeti men ónim sapasyn qadaǵalap, halyqtyń suranysyn zerttedi.
Bazar sórelerinde et, balyq, shujyq, bal men sút taǵamdary jáne jemis-jıdek pen kókónis túrleri kóp boldy. Ásirese, kartop pen pııaz 40-45 teńgeden, sábiz 45-50 teńgeden, qyryqqabat 25-ten, qyzanaq pen tátti buryshtyń ár kılosy 40 teńgeden boldy. Úshtóbe qalasyndaǵy «Úshtóbe-Aıdyn» JShS sary maı, súzbe, kilegeı, aıran, al «Úshtóbe-Mıraj» seriktestiginiń shujyq túrlerine tutynýshylar óz baǵalaryn berip, suranys artty. Al, Panfılov, Sarqan, Eskeldi aýdandarynyń aýyldyq okrýgteri alma, almurt, júzimniń túr-túrin jaıyp saldy.
Osy kúni taldyqorǵandyqtarǵa 9542,4 myń teńgeniń saýdasy jasalǵany belgili boldy. Endi ár senbidegi jármeńkeni halyq asyǵa kútedi.
Kúmisjan BAIJAN.
Almaty oblysy.