Bulbul ánshi beınesi

Kúlásh Baıseıitovaǵa eskertkish qoıyldy Qazaq operasynyń bulbuly, klassıkalyq án óneriniń jaryq juldyzy Kúlásh Baıseıitovaǵa Almaty qalasyndaǵy óz atyndaǵy mýzyka mektep-ınternatynyń aldyna eskertkish qoıyldy. El táýelsizdiginiń jıyrma jyldyǵyna, K.Baıseıitovanyń 100 jyldyǵyna oraılastyrylǵan sharaǵa óner qaıratkerleri men resmı qonaqtar qatysty. Músinshi Tileýberdi Bınashev som­daǵan Kúlásh eskertkishi ómirin ónerge arnaǵan qazaq áıeliniń keıpin ádemi jet­kizip tur. Taǵdyry kúrdeli ánshiniń kórgen marapaty men tartqan aýyrt­pa­ly­ǵynyń izi de joq. Tek qazaqtyń maq­ta­nyshy, dala áýezin álemdik klas­sı­kaǵa qosa bilgen qaıratker ǵana jas talant ıelerin rýhtandyryp turǵandaı. Eskertkishti K.Baıseıitova atyn­da­ǵy mektep-ınternattyń dırektory O.Abdýllaev pen qala ákimi A.Esimov saltanatty túrde ashyp, gúl shoqtaryn qoıdy. Jıylǵan kópshilik aldynda KSRO halyq ártisi, KSRO Memlekettik syılyǵynyń laýreaty, Eńbek Eri B.Tólegenova, Mádenıet vıse-mınıstri A.Bóribaev, bulbul ánshiniń týystary Q.Qana­bek­qyzy, Qazaqstannyń halyq ártisi B.Jamanbaev, son­daı-aq ánshiniń zamandastary sóz sóı­lep, estelikter aıtty. Atalmysh mek­teptiń sımfo­nııalyq orkestriniń súıemeldeýimen opera ánshisi B.Eńkebaeva keshegi Kúlásh apasy salǵan ánderdi quıqyljyta oryndady. Kesh sońynda mektep-ınternattyń dırektory O.Abdýllaev eskertkishtiń turǵyzylýyna qoldaý kórsetken «№1 qurylys kompanııasynyń» bas dı­rektory S.Ustabekovke, «Qubyla» qu­rylys kompanııasynyń prezıdenti О́.Qadyrovqa jáne eskertkish avtory, músinshi T.Bınashevke alǵys aıtty. Qanat ESKENDIR. Almaty. ------------------------------------------ Sýretterdi túsirgen Bersinbek SÁRSENOV.