Qazaqtyń mańdaıyna bitken aqyl-oı ıeleri tarıh betin paraqtap otyrsań, júzdep sanalady. Anaý ǵasyrlardaǵy Anaharsısten bastap ál-Farabı, Abaı, Alash arystary – osylaı jalǵasyp kete beredi.
О́tken ǵasyrdaǵy sol ulylardyń oıyn damytyp, jolyn jalǵaǵan ǵulama ǵalym, ózi sekildi el jaqsylarymen qatar júrip, Ulttyq Ǵylym akademııasynyń irgetasyn qalaǵan, alǵashqy korrespondent-músheleriniń biri bolyp sanalǵan. Aqjan ál-Mashanı edi. Mamandyǵy kenshi bolsa da qazaqtyń keń dalasyndaǵy jer baılyǵy men ultqa kerek rýhanı baılyqty qatar alyp júrdi. Sol aıtýly tulǵanyń 110 jyldyǵyna oraı L.N.Gýmılev atyndaǵy Eýrazııa ulttyq ýnıversıteti tarıh fakýlteti «Aqjan ál-Mashanı jáne farabıtaný taǵylymy» atty respýblıkalyq ǵylymı-tájirıbelik konferensııa ótkizdi.
Kelisti basqosýdy bilim ordasynyń prorektory, UǴA korrespondent-múshesi Dıhan Qamzabekuly ashyp, Alash rýhty ál-Mashanıdyń Keńes dáýiriniń ózinde ult muraty degende uly ister atqarǵanyn tarata aıtsa, professor Tilegen Sadyqov ǵulama ǵalymnyń máńgilik eldiń murat-maqsaty bıik bolatynyn dáıektep ketkenin alǵa tartty. Professor Serik Negımov ǵalym týraly estelikter aıtyp, ál-Farabı men qazaqty qaýyshtyrǵan ál-Mashanı ekenin jetkizdi. Al ǵalymnyń baı murasyn zerttep, zerdelep júrgen professor Zadash Dúkenbaeva aıtýly oqymystynyń 110 jyldyq mereıtoıyna arnalǵan is-sharalar týraly oı qozǵap, 100 jyldyǵy IýNESKO kóleminde atalyp ótkenin, osy sharanyń ózi el Táýelsizdiginiń 25 jyldyǵyna arnalyp otyrǵanyn tilge tıek etip, qazaq batyry Qasym Qaısenovtiń Baýyrjan Momyshuly týraly esteligin eske salyp, «ál-Farabı babamyzdyń álemde baryn alǵash Aqjan Mashanov jetkizgenin bilesiń be?» dep surap, «Ult joqshysy osylaı bolady» degenin mysalǵa keltirdi.
Konferensııada ál-Farabı men ál-Mashanı týraly keleli áńgimeler qozǵalyp, alda atqarýǵa tıis kemel isterge uıytqy bolýy jaıy da nazardan tys qalmady.
Súleımen MÁMET,
«Egemen Qazaqstan»