Almatydaǵy Ǵylym ordasynda «Qazaqstan Respýblıkasy Ulttyq ǵylym akademııasy habarlary. Geologııa jáne tehnıkalyq ǵylymdar serııasy» jýrnalynyń redaksııalyq alqa múshelerine Scopus halyqaralyq málimetter bazasynda Indeksteý jónindegi kýálik saltanatty túrde tabys etildi.
Ulttyq ǵylym akademııasynyń 1946 jyldan bastap shyǵyp turatyn 8 ǵylymı jýrnaly («UǴA Baıandamalary», «UǴA Habarshysy», «UǴA Habarlary. Bıologııalyq jáne medısınalyq serııasy», «UǴA Habarlary. Fızıka-matematıkalyq serııasy», «UǴA Habarlary. Geologııa jáne tehnıkalyq ǵylymdar serııasy», «UǴA Habarlary. Hımııa jáne tehnologııa serııasy», «UǴA Habarlary. Qoǵamdyq ǵylymdar jáne gýmanıtarlyq ǵylymdar serııasy», «UǴA Habarlary. Agrarlyq ǵylymdar serııasy») 1960-70-jyldary-aq reıtıngteri joǵary halyqaralyq ǵylymı jýrnaldardyń tizimine qosylǵan bolatyn.
Akademııanyń atalmysh ǵylymı jýrnaldary 1960 jyldan bastap AQSh, Ulybrıtanııa, Germanııa, Fransııa, Japonııa sııaqty 73 memlekettiń iri ulttyq kitaphanalaryna jiberilip turady. Osy jýrnaldardy túgeldeı halyqaralyq reıtıng berý jáne áıgili Elsevier kompanııasynyń Scopus málimetter bazasyna qosý jónindegi is-sharalar tolyq júzege asar bolsa, qazaqstandyq ǵalymdar, oqytýshylar men stýdentter kóptegen materıaldarǵa, aımaqtyq zertteý aqparattary men paıdaly siltemelerge, álemdik zertteýler salasyndaǵy qazirgi úrdisterdiń tolyq nusqasyna qol jetkize almaq.
Álemdik referatıvtik bazasynda 21000-nan astam ǵylymı-tehnıkalyq jáne medısınalyq, 5000-ǵa jýyq halyqaralyq basylym ındeksteletin Scopus málimetter bazasyna enip otyrǵan «UǴA Habarlary. Geologııa jáne tehnıkalyq ǵylymdar serııasy» jýrnalynyń redaksııalyq alqa músheleriniń mundaı úlken jetistikke jetýine jýrnal avtorlarynyń da joǵary sapaly ǵylymı maqalalarynyń jarııalanyp otyrýy sebepshi bolsa kerek. Endi Akademııanyń qalǵan tórt jýrnalyn da osy halyqaralyq bazaǵa kirgizý múmkindigi qarastyrylýda.
Nıderlandtyń Amsterdam qalasynan osy saltanatty jıynǵa arnaıy kelip, Ulttyq ǵylym akademııasynyń prezıdenti, professor Murat Jurynovqa óz qolymen Kýálik tabys etken Elsevier halyqaralyq kompanııasynyń atqarýshy vıse-prezıdenti Djıno Ýssı óz baıandamasynda: «Álem boıynsha 130-ǵa jýyq memleket ǵalymdary Scopus málimetter bazasynda maqalalar jarııalap otyrady, solardyń ishinde Qazaqstan ǵalymdary da bar. Alaıda qazaqstandyq ǵalymdar eńbeginiń sapasy áli de bolsa izdenýdi qajet etedi. Menińshe, sizder damyǵan elder úlgisi boıynsha damytýdy asa qajet dep sanaıtyn salalardy ǵana tańdap alyp, sol baǵyttaǵy ǵylymı izdenisterdi tereńdetkenderińiz jón», degen keńesin aıtty.
Elimizdiń álemdik keńistikke egemendi memleket retinde kirýi qazaqstandyq ǵylymnyń da biryńǵaı halyqaralyq ǵylymı keńistik ıntegrasııasyna ákelýde. Qazaqstannyń aldyńǵy qatarly ǵalymdary, ıaǵnı Akademııanyń tolyq músheleri (akademıkter) men korrespondent-músheleri, sheteldiń qurmetti músheleri kiretin Ulttyq ǵylym akademııasy JAP (Halyqaralyq ǵylymı máseleler boıynsha akademııaaralyq Keńesi), HǴAQ (Halyqaralyq ǵylym akademııalarynyń qaýymdastyǵy), TWAS (Úshinshi álem elderiniń ǵylym akademııalary), AASSA (Azııa elderiniń ǵylym akademııalary qaýymdastyǵy), IYU ǴAQ sııaqty birqatar halyqaralyq ǵylymı uıymdardyń moıyndalǵan múshesi bolyp sanalady.
Saltanatty jıynǵa ál-Farabı atyndaǵy QazUÝ rektory Ǵalymqaıyr Mutanov, Bilim jáne ǵylym mınıstr-ligi Ǵylym komıteti tóraǵasynyń orynbasary Asqar Járkenov, otandyq ǵylym salasynyń maıtalmandary men ǵylymı jýrnaldardyń basshylary qatysyp, sóz sóıledi.
Mıra BAIBEK,
«Egemen Qazaqstan»
ALMATY