Búgin Aqordada elimizdiń Memlekettik hatshysy Gúlshara Ábdiqalyqovanyń tóraǵalyǵymen QR Prezıdenti janyndaǵy azamattyq máseleler jónindegi komıssııanyń kezekti otyrysy ótti
Otyrysta el azamattyǵyna qabyldaý jáne odan shyǵarý máseleleri qaraldy. Shara barysynda Memlekettik hatshy Táýelsizdik alǵan sátten bastap Qazaqstannyń azamaty bolýǵa talpynýshy adamdardyń sany artyp kele jatqanyn málimdedi.
«Biz Táýelsizdigimizdiń 25 jyldyǵy qarsańynda elimizdiń jańa azamattaryn qarsy alýǵa óte qýanyshtymyz. Olarǵa baqytty ómir jáne Otanynyń ıgiligi úshin tabysty jumys tileımiz. Egemen Qazaqstannyń laıyqty azamaty bola otyryp, onyń ári qaraı damýyna óz úlesterin qosatyndyǵyna senemin», - dedi Gúlshara Ábdiqalyqova.
QR Prezıdenti tıisti Jarlyqqa qol qoıǵannan keıin jaqyn jáne alys shetelderden kelgen túrli ulttyń 622 ókili Qazaqstan azamaty atanatyn bolady.
Sonymen qatar, otyrys barysynda Ishki ister mınıstrliginiń Qazaqstan azamattyǵyna jeńildetilgen tártippen qabyldaý jáne azamattyqtan aıyrý máseleleri boıynsha jumys nátıjeleri talqylandy. Qorytyndysynda tıisti sheshimder men usynymdar qabyldandy.