Elimizdiń batysynda 15 jyl jazylǵan «Atyraý arýlary» kitabynyń tusaý kesildi, dep habarlaıdy aımaq basshysynyń baspasóz qyzmeti.
Shyǵarmanyń tanystyrylymy búgin, 24 qarashada Atyraý qalasynda ótken 2006-2016 jyldarǵa arnalǵan gendirlik strategııa týrasyndaǵy konferensııa barysynda boldy. Týyndynyń avtory, qoǵam qaıratkeri Rashılıa Mursalıevanyń aıtýynsha, kitapta parasat-paıymymen, erligimen, ónerimen este qalǵan ana-apalarymyzdyń ómiri jaıly syr shertiledi. «Kitapta qoǵamnyń ár salasynda salmaqty úles qosqan áıelder qaýymy týraly aıtylady. Aımaqta eńbek etken munaıshylar, balyqshylar, óner, qoǵam qaıratkerleri týraly aqparat fotosýretterimen berilgen. Álbette, bir kitaptyń ishine eńbegi eren analarymyzdyń bárin syıǵyza almadyq», – dedi avtor.
Atyraý oblysynyń ákimi Nurlan Noǵaev kitaptyń tusaýyn kesip turyp, el tarıhyndaǵy analarymyzdyń rólin sóz etti: «Halqymyzdyń basynan qıly zamandar ótti. Qıyn-qystaý kezeńderde ardaqty analarymyz tek otbasynyń berekesin keltirýmen aınalysqan joq. Elge jón siltep, erlermen birge elin-jerin qorǵaýǵa shyqqan qaıratkerler kóp boldy. Keshegi Fatıma, Bopaı analarymyz, bertindegi Hıýazdaı batyrlarymyz halyq úshin jan aıamaı ter tókti. Elimiz egemendik alǵan tusta da áıelderdiń róli esh kemigen joq. Bul kitap sol ardaqty analarymyzǵa arnalǵan. О́skeleń urpaq bul týyndyny oqyp-tanysyp, analarynyń erliginen úlgi alýy kerek. Kitaptyń munymen toqtap qalmaı, kelesi tomdarynyń da jazylyp, jaryq kórýin tileımin», – dedi Nurlan Noǵaev. Aımaq basshysynyń aıtýynsha, baspaǵa 15 jyl daıyndalǵan kitaptyń ıdeıasy QR Premer-Mınıstriniń orynbasary Imanǵalı Tasmaǵambetovke tıesili. Týyndyǵa bas redaktorlyq etken – tilshi-ǵalym Ǵarıfolla Ánes, al redaksııa alqasynda jumys istegender – Farıza Ońǵarsynova, Aıgúl Ájiǵalıeva, Qoıshyǵul Jylqyshıev, Sársenbaı Eńsegenov, Baqyt Imanǵalıev jáne Ábilhan Tóleýishevter.