Birikken Ulttar Uıymynyń beıbitshiligin ustap turý jóninde Operasııalar departamentiniń sarapshylary Qazaqstan Respýblıkasyna konsýltatıvtik saparmen keldi, dep habarlaıdy Qorǵanys mınıstrliginiń baspasóz qyzmeti.
Beıbitshilikti ustap turý jónindegi qazaqstandyq áskerı qyzmetshilerdiń operasııalarǵa qatysýǵa ázirligin aıqyndaý maqsatynda jumys sapary aıasynda BUU-nyń sarapshylary «Beıbitshilik úshin seriktestik» oqý-jattyǵý ortalyǵy («Qazsent») jáne «Qazbat» qazaqstandyq bitimgershilik batalonynyń qyzmetimen tanysty. Sarapshylar jumysynyń aldyn ala qorytyndysy 23 qarasha kúni Astanada QR Qorǵanys mınıstrliginiń ókilderimen kezdesý barysynda jarııa etildi.
BUU-nyń sarapshylary qazaqstandyq áskerı qyzmetshilerdiń daıyndyq deńgeıine joǵary baǵa berip, sonymen qatar, bitimgershilik kontıngentti daıyndaý jónindegi Uıymnyń jańa talaptary aıasynda birqatar usynymdardy belgiledi.
Qazirgi ýaqytta QR Parlamentiniń 2013 jylǵy qaýlysyna sáıkes qazaqstandyq armııanyń tórt áskerı qyzmetshisi Batys Saharasy (MINURSO) men Kot-d’Ivýardaǵy (UNOCI) BUU-nyń eki mıssııasynda qyzmet ótkerip júrgenderin aıta ketken jón. Sonymen birge, Qarýly Kúshterdiń toǵyz ofıseri BUU-nyń mıssııalarynda qyzmetterin atqaryp úılerine oraldy. Olardyń tórteýi bitimgershilikke qosqan úlesteri úshin marapatqa jáne mıssııa qolbasshylyǵynyń atynan alǵys hatqa ıe boldy.