Búgin túrkitildes elderdiń parlamenttik assambleıasy (TúrkPA) Ázerbaıjan Respýblıkasy Mıllı Májlısi jáne Túrki mádenıeti men mırasy qorymen birlese otyryp, Bakýde birqatar túrkitildes elder táýelsizdikteriniń 25-jyldyq mereıtoıyna arnalǵan konferensııa ótkizdi, dep habarlady «QazAqparat».
Is-sharaǵa Qazaqstan, Qyrǵyzstan, Ázerbaıjan men Túrkııanyń zań shyǵarýshy organdarynyń ókilderimen, atalǵan elderdiń, Bakýdegi dıplomatııalyq ókildikteriniń basshylary qatysty
«Bul tarıhı kún, byltyr ǵana toılap ótken Qazaq eli memlekettiliginiń 550 jyldyǵynyń qorytyndy jetistigi. Úsh ǵasyrǵa jýyq otarshyldyqty basynan keshken Qazaq eli, HH ǵasyrdyń aıaǵynda qaıta jańǵyrǵan memleket. Táýelsizdiktiń 25 jyldyq mereıtoıy jańa tarıhymyzda zamanaýı memleket qurǵan elimizdiń aýqymdy tarıhı jetistikteriniń jarqyn kórinisi. Qazaqstan úshin Táýelsizdiktiń 25 jyly - ilgerileý men qarqyndy damýdyń kezeńi boldy. Biz jańa tarıhymyzda tabysty jáne Ortalyq Azııa óńirinde kóshbasshysy memleket ekendigimizdi dáleldedik. О́z Táýelsizdiginiń 25 jylynda elimizdiń ekonomıkasy belsendi damyǵan, tabysqa jetýdiń biryńǵaı, biregeı tájirıbesi bar saıası-áleýmettik turaqty memleket retinde qalyptasty», – dedi QR Ázerbaıjandaǵy Tótenshe jáne О́kiletti Elshisi Beıbit Isabaev.
Sondaı-aq elshi, óz sózinde táýelsiz Qazaqstannyń barlyq jetistikteri men jeńisteri árbir qazaqstandyqtyń tabandy da tynymsyz eńbeginiń arqasynda múmkin bolǵandyǵyna basa toqtaldy.
«Eń bastysy Memleket basshysy naqtylaǵan «Qazaqstan 2030» Strategııasynyń maqsattary men mindetteri oıdaǵydaı júzege asyryldy. Elbasymyzdyń saıası erik-jigeri jáne strategııalyq kóregendigi damýdyń qazaqstandyq úlgisiniń tabysty bolýyn aıqyndap, Qazaqstannyń ornyqty ósip-órkendeý jolyna shyǵýyna múmkindik týdyrdy. Qazir elimiz «Qazaqstan 2050» Strategııasyn dáıekti túrde júzege asyra otyryp, álemniń ozyq 30 eliniń qataryna qosylýǵa qaryshty qadam basty. Elbasy N.Nazarbaevtyń baıypty halyqaralyq bastamalarymen elimiz úlken halyqaralyq bedelge ıe bolyp, ǵalamdyq ıadrolyq qarýsyzdaný qozǵalysynyń tanymal kóshbasshysyna aınaldy. О́ziniń jańa tarıhynda birneshe ret ótkergen ǵalamdyq ekonomıkalyq daǵdarystar kezeńinde der kezinde júzege asyrylǵan saıası ekonomıkalyq reformalardyń arqasynda elimiz ekonomıkasyn túzep, tyǵyryqtan shyǵa bildi. Sarabdal syrtqy saıası baǵytty qalyptastyryp, ekonomıkasy nyǵaıa otyryp, ózin búkil álemge senimdi, ári turaqty seriktes retinde tanytty», – dep atap ótti.
Sonymen qatar, Qazaqstannyń Eýropadaǵy qaýipsizdik jáne yntymaqtastyq uıymynda, Shanhaı yntymaqtastyq uıymynda, Islam yntymaqtastyǵy uıymynda tóraǵalyq etýi Qazaq eliniń dúnıe júzi qaýymdastyǵy aldyndaǵy bedelin bıiktete túskenin aıtty.
Is-sharanyń ashylýynda sóılegen Ázerbaıjan Respýblıkasy Mıllı Májlıs tóraǵasynyń birinshi orynbasary Zııafát Áskárov túrkitildes elderden kelgen depýtattarǵa, osy elderdiń Bakýde ornalasqan elshilerine jáne de halyqaralyq uıymdardyń ókilderine jyly lebizin bildirdi.