Memlekettik qyzmet isteri jáne sybaılas jemqorlyqqa qarsy is-qımyl agenttiginiń bastamasymen QR Parlamenti «aınadaı» nómirler men «ádemi» áripter serııasyn erekshe tarıfpen beriletin jáne joǵary suranysty memlekettik belgiler tizimine engizý týraly zań jobasyn qaraýda.
Bul týraly Memlekettik qyzmet isteri jáne sybaılas jemqorlyqqa qarsy is-qımyl agenttigi men IIM birlesip ótkizgen «Ákimshilik polısııa komıtetiniń qyzmetindegi sybaılas jemqorlyqpen kúres monıtorınginiń qorytyndysy men jemqorlyq qaýpiniń syrtqy taldamasy» atty selektorlyq jınalysynda aıtyldy, dep habarlady MQSJQA baspasóz qyzmeti.
Atalmysh bastama sońǵy eki jylda 5,2 mlrd. teńgeni quraǵan osyndaı nómirlerdiń kóleńkeli aınalymyn memlekettik nómirlerdi satýdan túsken bıýdjet kiristeriniń kólemimen salystyrýdan týǵan.
Budan bólek, jınalysqa qatysýshylar ákimshilik óndiris materıaldary boıynsha derekqorǵa ýaqtyly málimet engizbegen jaǵdaılar quqyq buzýshylardyń jaýapkershilikten jaltarýlaryna múmkindik beretinin atap ótti. Tek Mańǵystaý oblystyq IID boıynsha derekqorǵa engizilmegen 14 myńnan astam materıal anyqtaldy. Almaty oblysyndaǵy osyndaı jaǵdaılar myńnan asady.
Jol qozǵalysyn baqylaýdy barynsha avtomattandyrý, stasıonarlyq spıdometrler men onlaın kameralar, qol radarlary men vıdeotirkegishterdiń tıimdi qoldanylýy, sondaı-aq komıtettiń memlekettik qyzmet kórsetý talaptary men reglamentterin úılestirý qajettiligine basa nazar aýdaryldy.
Jınalysta QR IIM ózindik qaýipsizdik departamentiniń basshysy K.Ospanov IIM-degi jemqorlyqpen kúres jumystarynyń barysy týraly baıandady.