Sársenbiniń sátinde Almatydaǵy Yqylas atyndaǵy Halyq mýzykalyq aspaptar murajaıynda «Altyn qalam-2016» táýelsiz ádebı júldesiniń kezekti jeńimpazdary marapattaldy.
Júldege usynylǵan ilkimdi shyǵarmalar iriktele kele, qazaq jáne orys tilderinde jazylǵan 30 shyǵarma 6 atalym boıynsha qorytyndy saıysqa jiberilgen bolatyn. Táýelsiz ádebı júlde úshin elimizdiń barlyq aımaqtaryndaǵy avtorlar «talasqanyn» aıta ketelik. Jumystar ústimizdegi jyldyń 1 shildesinen bastap qazan aıynyń 15-ne deıin qabyldanyp, oqyrmandar qazannyń 31-ne deıin daýys berdi. Barlyq shyǵarma akalam.kz saıtyna ornalastyryldy. Bıyl baıqaýǵa 446 avtor ár túrli janrda jazylǵan 863 shyǵarmasyn usynǵan.
Sonymen, qazylar alqasynynyń sheshimimen «Jyldyń úzdik poezııasy» júldesin shymkenttik aqyn Dáýren Aımanbetov aldy. «Jyldyń úzdik prozasy» almatylyq Jánel Ábýzarovanyń «Tezekbaı» shyǵarmasyna berildi. «Jyldyń úzdik kıno ssenarııi jáne dramatýrgııasyn» almatylyq Nurlan Qamıdyń «Qalamgeri» aldy. «Jyldyń úzdik balalar jáne jasóspirimder ádebıeti» syılyǵyna Ońtústik Qazaqstan oblysynan Orynbasar Súttibaıdyń «Qanatty barys, kók bóri jáne Babyr batyr» ertegisi laıyq dep tabylǵan. «Jyldyń úzdik satırasy» báıgesin ekibastuzdyq Saılaý Baıbosynnyń «Asqazanyńyz aýyrmaı ma?» atty dúnıesi aldy.
Sol sııaqty «Jyldyń úzdik fantastıka nemese detektıv shyǵarmasy» ataýly syılyǵy boıynsha Dildágúl Nurmahanbettiń «Qupııa jáshik tutqyny» marapattaldy.
Al orystildi avtorlar ishinde Natalıa Slýdskaıanyń «Oranjevoe na serom» jyry úzdik atansa, prozada kókshetaýlyq Orynbaı Janaıdarovtyń «Poslednıı han Zolotoı Ordy» shyǵarmasynyń joly boldy. Orystildi balalar ádebıetindegi bas júlde bar bolǵany 14 jastaǵy pavlodarlyq avtor Gúlnur Baýyrjanovanyń «Nevozmojnoe» áńgimesine berildi. Satırada «Tarakany v golove» shyǵarmasymen qyzylordalyq Natalıa Denısovanyń týyndysy top jardy. Sol sııaqty úzdik fantastıka retinde almatylyq Lıýdmıla Lazarevanyń «Koordınatory» jeńiske jetti. «Jyldyń úzdik kıno ssenarııi jáne dramatýrgııasy» Mádına Rahymbaevanyń «Snegopad» ssenarııi marapattaldy.
Sonymen qatar, qazylar alqasynyń sheshimimen «Qazaq ádebıetine qosqan eleýli eńbegi úshin» «Babalar sózi» júz tomdyǵyn shyǵarǵan M.Áýezov atyndaǵy Ádebıet jáne óner ınstıtýty marapattaldy.
Bıylǵy júldeniń basty oqıǵasy – el Táýelsizdiginiń 25 jyldyǵyna oraı qazaqtyń úzdik romanyna alǵash ret arnaıy báıge jarııalandy. «Jyldyń úzdik romany» atalymy boıynsha «Men jyndymyn» shyǵarmasymen jeńimpaz atanǵan Turysbek Sáýketaev mesenat Keńes Raqyshev taǵaıyndaǵan 1 000 000 teńgege ıe boldy.
Bul baıqaýdyń basty oljasy – QAZKOM bankiniń qarjylaı qoldaýymen baıqaýdyń tańdaýly shyǵarmalary 2017 jyly jaryq kóretin «Altyn qalam-2016» ádebı júldesiniń jınaǵyna enedi.
Aınash ESALI,
«Egemen Qazaqstan»
ALMATY