QR Mádenıet jáne sport mınıstrliginiń tapsyrysy boıynsha túsirilgen «Juldyzdar toǵysqanda» fılmi Fransııanyń Onflıor qalasynda qarashanyń 22-i men 27-i aralyǵynda ótetin XXIV Reseılik kıno festıvalinde (Festival du Cinema Russe) «Erekshe qubylys» baǵdarlamasy aıasynda kórsetiledi, dep habarlady Sháken Aımanov atyndaǵy «Qazaqfılm» AQ.
Esterińizge sala ketsek, atalmysh fılmniń tusaýkeseri 2016 jyly sáýirde Astana qalasynda ótti. Onyń rejısseri Sergeı Snejkın. Kartına Máskeý qalasyndaǵy «Kıno úıinde» jáne Reseı Federasııasynyń mádenıet mınıstrliginde, sonymen qatar Halyqaralyq Jibek joly kınofestıvalinde arnaıy kórsetilgen bolatyn.
Reseı kınosynyń festıvali álemniń túkpir-túkpirinen tanymal kınogerlerdiń qatysýymen ótetin eń aýqymdy festıvalderdiń biri. Bıyl festıval aıasynda Reseı, Qazaqstan, Fransııa jáne AQSh elderinen iriktelgen barlyǵy 26 fılm kórsetiledi. Qazylar alqasynyń tóraǵasy – jazýshy jáne prodıýser Frederık Begbeder. Sondaı-aq, festıvaldiń úzdikterin prodıýser Meı Shen Shale, aktrısa Sırel Kler, aktrısa Krısta Tere, aktrısa Vıktorı Ollokýı jáne kınosynshy Fılıpp Rýıe anyqtaıtyn bolady.
«Juldyzdar toǵysqanda» kórkem fılmi 26 qarashada saǵat 14:00-de «Henri-Jeanson» kınoteatrynda fransýz tilindegi sýbtıtrlerimen kórsetiledi.