Jáńgir han atyndaǵy Batys Qazaqstan agrarlyq-tehnıkalyq ýnıversıtetinde el Táýelsizdiginiń 25 jyldyǵyna arnalǵan «Júrekten júrekke» atty mesenattar men qaıyrymdylyq kómegin berýshilerdiń I oblystyq forýmy bolyp, osy saladaǵy úzdikter marapattaldy, dep habarlady QazAqparat.
Elbasy Qazaqstan halqy Assambleıasynyń 24-sessııasynda QHA-ǵa qaıyrymdylyq kórsetý men medıasııany júrgizýdi júktegeni málim. Osy mindetter aıasynda qıyn jaǵdaıda qalǵan azamattarǵa qaıyrymdylyq kómekter berilýde, az qamtylǵan otbasylar, jetim balalar men múgedekterdi áleýmettik qoldaýmen turaqty túrde aınalysatyn qoǵamdyq birlestikter jumys jasaýda. Jalpy, bıyl óńirde 5 myńnan astam túrli qaıyrymdylyq sharalary ótkizilip, olardy uıymdastyrýǵa 3 myńnan astam adam qatysty. Batysqazaqstandyqtarǵa jyl ishinde 30 mln. teńgeden astam járdem berildi. Sondyqtan qoǵamda qaıyrymdylyq isteriniń budan da keńirek qanat jaıýy asa mańyzdy.
Shara sońynda úzdik mesenattar marapattaldy. Eriktilerdiń eńbegi de mol ekeni atap ótildi. Osy kúni «Qaıyrymdylyq kerýeni» uıymdastyrylyp, óńir kásipkerleri atynan 110 az qamtylǵan jáne kóp balaly otbasylarǵa azyq-túlik qorjyny jetkizildi.