Búgin Aral aýdanynda Qyzylorda oblysy ákimdiginiń kóshpeli otyrysy ótti. Jıynda aýdandy damytýǵa baǵyttalǵan «Jol kartasyn» iske asyrý barysy talqylandy.
Májilisti ashqan oblys ákimi Qyrymbek Kósherbaev óńirdiń 2016 jyly jetken jetistikteri týraly baıandady. Syr óńiri tórtinshi jyl qatarynan kúrishten rekordtyq ónim jınap keledi. 2013-2016 jyldar aralyǵynda Qyzylordada 11 jańa móltek aýdan boı túzedi. Aımaq turǵyndarynyń 95 paıyzy ortalyqtandyrylǵan sý júıesine qosylǵan, al oblys ortalyǵynyń turǵyndary Qyzyljarma jerasty taza aýyz sýyn paıdalanyp otyr.
- Munaı óndirý kóleminiń azaıýy oblys ekonomıkasyna keri áserin tıgizetini sózsiz. Sondyqtan biz jańa óndiris oryndaryn ashý arqyly ekonomıkany ártaraptandyrý sharalaryn qolǵa alýdamyz. Mysalǵa, Shıeli aýdanynda vanadıı zaýytyn salý týraly osydan eki kún buryn London qalasynda kelisimge qol qoıdyq. Alda atqarylar jumys orasan, sol úshin toqmeıilsýge bolmaıdy,- dep atap ótti Qyrymbek Kósherbaev.
Kóshpeli otyrys barysynda Aral aýdanynyń ákimi Muhtar Orazbaev aýdannyń áleýmettik-ekonomıkalyq damýy týraly baıandady. О́ńdeý ónerkásibinde ósim baıqalady, ásirese balyq óńdeý kólemin arttyrý jáne ony alys-jaqyn shet memleketterge eksporttaýda ilgerileý bar. Sonymen qatar, aýdan ákimi shaǵyn jáne orta kásipkerlikti damytýda da jaqsy kórsetkishterge qol jetkizgendikterin aıtty.
Oblys ákiminiń orynbasary Qýanyshbek Ysqaqov 50-den astam sharany qamtıtyn Aral aýdanyn damytýǵa baǵyttalǵan Jol kartasyn tanystyrdy. Jol kartasyna engen jobalar respýblıkalyq, oblystyq jáne aýdandyq bıýdjetterden qarjylandyrylatyn bolady. Oblys ákimi Qyrymbek Kósherbaev qarjy máselesi sheshilmegen jobalar Jol kartasyna engizilmesin jáne el Úkimetinen bólinetin qosymsha qarajat Aral, Qarmaqshy, Jalaǵash aýdandaryndaǵy kásipkerlikti damytýǵa baǵyttalsyn degen tapsyrma berdi.