Almatydaǵy P.Chaıkovskıı atyndaǵy mýzykalyq kolledj stýdenti О́zbekstan astanasynan úlken jeńispen oraldy. Barlyǵy 405 adam qatysqan óner dodasynda Qorqyttyń qobyzyn sarnatqan qazaq qyzynyń eńbegi, ustazynyń úmiti aqtaldy, dep habarlady BNews.kz.
Bıylǵy óner saıysyna 9 elden barlyǵy 405 ónerpaz qatysty. Olar 12-15 jáne 16-19 jas aralyǵynda eki topqa, ár top boıynsha úrmeli, ysqyshtar, urmaly jáne ishekti aspaptar nomınasııasy boıynsha bólindi.
Almatydan osy baıqaýǵa arnaıy barǵan P.Chaıkovskıı atyndaǵy mýzyka kolledjiniń 4 kýrs stýdenti Indıra Jandashova ysqyshtar nomınasııasy boıynsha birinshi oryndy jeńip aldy.
«Bul jalpy úlken konkýrs. Bizdiń nomınasııa boıynsha Qazaqstan, О́zbekstan, Qyrǵyzstan, Tájikstan jáne Ázerbaıjannan ónerpazdar qatysty. Qaısysy bolmasyn ónerli, talantty mýzykanttaryn alyp kelgen. Biz de osy baıqaýǵa tııanaqty daıyndaldyq. Shákirtim Indıra ysqysh aspaptardyń ishinde qobyzben shyǵyp, tamasha óner kórsetip, birinshi oryndy jeńip aldy. Eńbegimiz jandy. Meniń úkilegen úmitim aqtaldy. Qýanyshymyzda shek joq», – dedi jeńimpazdyń ustazy Gúlaıym Qojamqulova.
«Týǵan eldiń áýeni» halyqaralyq baıqaýy 2014 jyldan beri dástúrli túrde ótip keledi. Atalǵan baıqaý qarapaıym ónerpazdardyń konkýrsy emes, kásibı mýzykalyq bilim beretin arnaıy jáne joǵary oqý oryndarynyń túlekteri men ustazdary qatysatyn doda.