Ajary kúnnen-kúnge aıshyqtalǵan arý Astana búginde tek Qazaqstannyń elordasy ǵana emes, sonymen birge, jahandyq sharalardyń ortalyǵy bolyp tabylatyn álemdik dárejedegi iri megapolıstiń birine aınalǵany aqıqat. Muny halyqaralyq sarapshylar da erekshe atap kórsetýde. Osy jaqynda, 17 qarashada National Geographic Traveler (Reseı) jýrnaly elordamyz – Astana qalasyn qarqyndy damýy jáne joǵary týrıstik áleýeti úshin «Bolashaqtyń qalasy» atty arnaıy syılyqpen marapattady.
«Keler jyly Astanada EKSPO-2017 halyqaralyq mamandandyrylǵan kórmesi ótedi. Osyǵan baılanysty Qazaqstannyń bas qalasyna degen qyzyǵýshylyq ósýde. О́mirdiń ózi kórsetip otyrǵandaı, Qazaqstan – bul úlken áleýetke ıe, bolashaqtyń baǵyty. Astana qalasy búginde álemge keńinen tanylǵan mádenı jáne áleýmettik iri megapolıs. Bul qalaǵa degen týrısterdiń qyzyǵýshylyǵy jyldan-jylǵa artyp keledi. Biz týrızm jáne saıahat týraly halyqaralyq jáne reseılik basylym retinde bul aqıqatty nazardan tys qaldyra almadyq», dedi National Geographic Traveler jýrnalynyń bas redaktory Olga Iаkovına.
Sáni men saltanaty jarasqan Astananyń ataǵy barǵan saıyn kópshiliktiń qyzyǵýshylyǵyn týǵyzǵan erekshe brendke aınalyp kele jatqandyǵy anyq. Álemdik arhıtektýranyń nebir ozyq úlgilerin jarasymdyqpen pash etken eńseli elordanyń kórki tórtkúl dúnıeni qyzyqtyryp otyr. Oǵan jyldan-jylǵa artyp kele jatqan týrıster tasqyny dálel. Investısııalar jáne damý mınıstrliginiń Indýstrııa jáne týrızm departamentiniń derekteri boıynsha, bas qalanyń irgetasy qalanǵan 18 jyl ishinde elordadaǵy qonaqúıler sany 40 ese ósip, qalamyzǵa shetelderden keletin týrıster sany 50 ese artypty. Ishki týrızm 43 ese ósken. Eger keletin týrıster sanyn Astana qalasynyń árbir 1000-shy turǵynyna shaqqanda elordamyz dúnıe júzi týrısteriniń eń kóp baratyn Seýl, Ystanbul sııaqty qalalarmen teńesedi eken.
«Astana Konvenshn Bıýro» JShS-niń dırektory Sanııar Aıtakenovtiń aıtýynsha, sońǵy jyldary elordanyń týrıstik áleýetin arttyrý maqsatynda aýqymdy sharalar júzege asyrylǵan. Bul rette «Smart Astana» jobasynyń mańyzy erekshe zor. Bul zamanaýı jobanyń negizgi operatory – «Astana Innovations» AQ mamandarynyń pikirinshe, bul baǵyttaǵy jumys negizinen úsh tarapta – ınnovasııalyq startaptardy qoldaý, «Smart Astana» baǵdarlamasyn júzege asyrý, sonymen birge, Astana qalasynyń tirshilik qyzmetin keshendi qamtamasyz etý júıesin damytý boıynsha júrgiziledi. Bul júıeniń basty maqsaty – elorda turǵyndary men qonaqtarynyń qaýipsizdigin arttyrý, qaladaǵy kólik qozǵalysynyń jaǵdaıyn jaqsartý, qalanyń qyzmet kórsetý salasynda jańa tehnologııalardy qoldaný. Innovasııalyq jobalardy ómirge engizý nátıjesinde EKSPO-2017 halyqaralyq mamandandyrylǵan kórmesine dúnıeniń tórt buryshynan keletin qonaqtarǵa Astana qalasy «aqyldy qalalardyń» kóshbasshysy retinde qaltqysyz qyzmet kórsetýdi basymdyqpen is júzine asyrmaq.
National Geographic Traveler jýrnalynyń «Bolashaq qalasy» arnaıy syılyǵyn tapsyrý saltanatynda, «Astana EKSPO-2017» ulttyq kompanııasynyń ilgeriletý jáne týrızm departamenti dırektorynyń orynbasary Roza Asanbaeva Búkilálemdik kórme ótkizý sheńberinde atqarylyp jatqan jumystarǵa toqtala kelip, dúnıe júzinen keletin týrısterge kórsetiletin joǵary sapaly qyzmetti tilge tıek etti. «Astana qalasynda ótetin EKSPO-2017 kórmesiniń bas taqyryby – «Bolashaq energııasy» dep atalady. Osyǵan baılanysty bul kórmege álemde qyzyǵýshylyq óte joǵary bolyp otyr. Soǵan sáıkes kórme qonaqtaryn joǵary deńgeıde qarsy alý sharalary jan-jaqty oılastyrylýda. Kórme qonaqtaryna 3 000 taqyryptyq jáne oıyn-saýyq is-sharalary kórsetiletin bolady. Onyń ishinde dúnıe júzine tanymal estrada juldyzdarynyń qatysýymen ótetin konsertter, arnaıy sahnalyq qoıylymdar, shoýlar men sherýler erekshe áserli bolady dep kútilýde», dedi Roza Asanbaeva.
«Astana EKSPO-2017» ulttyq kompanııasy National Geographic Traveler jýrnalynyń syılyq áriptesi retinde Qazaqstan boıynsha ótkizilgen týrıstik baıqaýǵa qatysýshylarǵa arnaıy sertıfıkat tapsyrdy. Qazaqstan boıynsha saıahat týraly áserli esseler jibergen 45 úmitkerdiń ishinde reseılik Marııa Mesherıakova «Qazaqstan – jańalyqtar ashatyn ýaqyt» atalymy boıynsha jeńimpaz dep tanyldy. «Qazaqstanda bolǵan meniń dostarym ǵajaıyp Kólsaı kóli týraly tamsana aıtqan bolatyn. Kólsaı shejiresiniń meni qyzyqtyrǵandyǵy sonsha, baıqaýǵa qatysyp, arnaıy saıahat sheńberinde Kólsaıǵa barý baqytyna ıe boldym», deıdi Marııa Mesherıakova.
Iá, Astana álem týrısterin qyzyqtyratyn ortalyqqa aınaldy. Oǵan aldaǵy jyly ótetin Búkilálemdik EKSPO-2017 kórmesiniń qosar úlesi de ólsheýsiz. Shartaraptan keletin týrısterdiń joǵary talabynan shyǵý maqsatynda elordamyzda barlyq sharalar oılastyrylýda.
Jylqybaı JAǴYPARULY,
«Egemen Qazaqstan»