Keshe Elbasy kitaphanasynda Qazaqstan Respýblıkasynyń Tuńǵysh Prezıdenti kúnine jáne el Táýelsizdiginiń 25 jyldyǵyna oraılastyrylǵan Memleket basshysy Nursultan Nazarbaevtyń jahandyq qaýipsizdikti nyǵaıtýǵa, sondaı-aq, yqpaldastyqty kúsheıtýge baǵyttalǵan ıdeıalary men bitimgershiligi arqaý bolǵan «Jahandyq bastamalar» galereıasy ashyldy.
El Táýelsizdiginiń 25 jyldyǵy mereıtoıyna oraı 25 taqyryptyq is-shara belgilengendigin Elbasy kitaphanasy dırektorynyń orynbasary Japsarbaı Qýanyshev erekshe atady. Onyń aıtýynsha, ústimizdegi jyldyń 21-shi qarashasynan bastalatyn sharalar kelesi aıdyń 15-ine deıin kúnbe-kún ótkizilip turady. Bul kúnderi árbir taqyryp boıynsha foto, beıne jáne muraǵattyq qujattar kelýshiler nazaryna usynylady. Keshegi kúnniń taqyryby Elbasynyń jahandyq bastamalaryna arnalsa, onymen tanysý úshin Almaty jáne Astana qalalarynan oqýshylar shaqyrtylǵany belgili boldy.
Elimizde oryn alǵan mańyzdy oqıǵalarǵa arnalǵan 40-qa tarta kitap sórege qoıylyp, oqyrmanǵa usynylyp otyr. Kitaphana jumysy bóliminiń jetekshi sarapshysy Aıdynkól Kóshkenova sol kitaptardyń birqatarymen tanystyryp ta ótti. Atap aıtqanda, sórege K.Boztaevtyń Semeı jerinde alǵashqy atom bombasynyń jarylýyna 50 jyl tolýyna jáne E.Iаkýbovskaıanyń synaq polıgonyna 60 jyl tolýyna oraı jazylǵan dúnıeleri qoıylǵan. Sonymen qatar, munda Iý.Kýıdınniń Qazaqstannyń ıadrolyq qasireti fotoalbomy 40 jyldan astam ýaqytqa sozylǵan ıadrolyq jarylystyń qasiretin ashyp kórsetedi. Budan basqa, sórege Álemdik jáne dástúrli dinder lıderleriniń birinshi sezine arnalǵan kitap ta bar. Jınaqta qujattar, sóılegen sózder men quttyqtaýlar kórinis tapqan. Jáne Qazaqstan men EQYU arasyndaǵy yntymaqtastyǵyn saralaýǵa arnalǵan monografııa da qalyń oqyrmanǵa usynylypty.
Jalpy, kitaptar arasynda jańa strategııalyq kókjıekterge jol ashqan Elbasynyń beıbit ómirge úndeıtin «Álem. HHI ǵasyr» manıfesin, Azııadaǵy ózara yqpaldastyq jáne senim sharalary jónindegi keńesi, Eýrazııalyq ekonomıkalyq odaqty, Shanhaı yntymaqtastyq uıymyn qurý ıdeıalaryn ashyp kórsetetin týyndylar da qoıylǵan. Sondaı-aq, kelýshilerge úlken ekran arqyly muraǵat materıaldary men Elbasy bastamalary týraly fılm usynyldy.
Taǵy bir aıta keterligi, Elbasy kitaphanasynda «Bastama jáne áriptestik» ınteraktıvti ústeli arqyly kelýshiler ózderine qajetti aqparattardy ala aldy. Osyndaı árbir ústelde taqyryptyq málimetter molynan ornalastyrylǵan. Dırektor orynbasary J.Qýanyshev reti kelgende bul jınaqtalǵan málimetterdiń barlyǵy 25 jylda elimizdiń áleýmettik-ekonomıkalyq, qoǵamdyq-saıası jetistikterdiń joǵary deńgeıde jáne onyń halyqaralyq qoǵamdastyq tarapynan qoldaý taýyp otyrǵandyǵynyń bir aıǵaǵy ekendigin alǵa tartty. «Elbasynyń jahandyq bastamalary beıbit álem ornatý. Adamzat óz-ózin saqtaǵysy kelse, barlyq máselelerdi beıbit jolmen sheshe bilýi kerek. Iаdrolyq qarýdan bas tartqan abzal. Sondyqtan da Elbasy saıasaty dúnıe júzinde óziniń qoldaýyn taýyp jatyr. Osy jıyrma bes jyldyń ishinde atqarylǵan isterdiń ǵasyrǵa turatyndaı aýqymdyq kórinisi», dedi ol óz sózinde. Jalpy, Qazaqstan Respýblıkasynyń Tuńǵysh Prezıdenti kúnine jáne elimiz Táýelsizdiginiń 25 jyldyǵyna oraı segiz kórme uıymdastyrylyp otyr. Oǵan jeke kýáligi bar kez kelgen adam kirip, tamashalaýyna múmkindigi bar. Tipti, bul úshin ústimizdegi jyldyń 28 qarashasy men 23 jeltoqsany aralyǵynda ashyq esik kúnderi dep jarııalanyp otyr.
Asqar TURAPBAIULY,
«Egemen Qazaqstan»