Tuńǵysh sańyraýqulaq festıvali

Altyn kúz –  jıyn-terinniń ǵana emes, jumystyń da qaına­ǵan kezi. Osy bir berekeli maý­sym­da oblysta tuńǵysh ret sa­ńyraýqulaq festıvaliniń ótki­zi­lýinde ózindik taǵylym bary anyq. Qazaqstan Táýelsizdiginiń 20 jyldyǵy qarsańyndaǵy merekelik sharalar aıasyndaǵy festıval jumyspen qamtý jónin­degi memlekettik baǵdarlamany el ishine jaqyndata túskendeı edi. – Tabıǵaty kórkem Aqmola oblysy onyń sansyz yryzdy­ǵy­nan da kende emes, – deıdi eldi eleń etkizgen sharany uı­ym­dastyrýshy Aqmola oblys­tyq jumyspen qamtý jáne áleýmettik baǵdarlamalardy úı­lestirý basqarmasynyń bas­ty­ǵy Baqyt Esimova. – О́lke­miz­degi ózin-ózi jumyspen qam­tý­shy 3000-nan astam adam orman jemis-jıdekteri men sańyraý­qu­laq jınap, ony óńdep, satýmen aınalysady. Festıvaldi uıym­das­tyrýdaǵy maqsatymyz – tur­ǵyndardy shaǵyn jáne orta bıznesti damytýǵa shaqyrýmen qatar, memleket tarapynan jasalyp jatqan kómek-qoldaý jóninde túsinik berý. Biz aldaǵy kezde osy turǵydaǵy sharalar jurtshylyq tarapynan qoldaý taýyp, dás­túrli sıpat alady degen senimdemiz. Al, birinshi sharamyzdyń sımvoly bolǵan sańyraýqulaq ob­lysymyzdyń vızıttik karta­syna aınalmaq. О́ıtkeni, ólke­miz­de onyń taǵamdyq otyzdan astam túri ósedi. Festıval barysynda «Eýrazııa grýpp» JShS jáne «Týran Profı» halyqaralyq kásibı aka­de­mııasynyń maman­da­ry sheber-synyptar ótkizetin bolady. «Astana – Býrabaı» avtoma­gıs­traliniń Bulandy orman­da­ryn­daǵy qos jaqtaýy merekedegideı bezendirilgen. Sharany uı­ym­­dastyrýǵa uıytqy bolǵan Bu­landy jáne Eńbekshilder aýdan­darynyń basshylyǵy 50 saýda núktesin jabdyqtap, kıiz úılerdi de tigip tastapty. Sahna tórinde kórkemónerpazdar úıir­me­siniń konserti úzdiksiz jal­ǵa­syn tabýda. Arqan tartý, qol kú­re­si, ziltemir kóterý sııaqty ja­rys­tardyń qyzyǵy da bir tóbe. Balǵyndarǵa bazarlyq retinde ob­lystyq bas­qarma úrmeli at­trak­sıondardy arqalap kelgeni qýa­nyshty eseleı tústi. Halyq­tyq qolóner sheberleriniń kór­me­si tartymdy áser qaldyrdy. Festıvaldiń basty sharasy: «Úzdik sańyraýqulaq jınaýshy», «Eń úlken sańyraýqulaq», «Bilgir otbasy», «Emdik sharalar» baıqaýlaryna jurtshylyq aı­ryq­sha yqylas bildirdi. Qazylar alqasynyń talqysyna sańy­raýqulaq, orman jıdekteri men baý-baqsha ónimderiniń, baldyń 68 túri usynyldy. Jurtshylyq kútkendeı, bas júlde – «Sańyraýqulaq oskaryn» Makın qalasynyń turǵyny Aleksandr Kostrov jeńip aldy. Ol osy kásippen arnaıy patent arqyly 20 jyldan beri otbasymen birge aınalysyp keledi eken. Al, Eń­bek­shilder aýdanynyń ókilderi arasynda Olga Shevsovanyń mereıi ústem boldy. – Sońǵy kezderi bul kásipke shynaıy betburys baıqalady, – deıdi Eńbekshilder aýdanynyń ákimi Temirjan Hamıtov. – Jańa avtobannyń 40 shyqyrymdyq jıeginde ornalasqan Qaratal, Qo­ǵam, Máten, Qaraǵaı, Bulandy, Maqpal sııaqty 18 aýyldyń turǵyndary qosymsha tabys kózin taýyp otyr desek, artyq aıtqandyq emes. Bıznestiń túrleri de kóbeıe túsýde. Sonyń biri – orman baılyǵyn tuty­ný­shyǵa usyný. Búgingi sharaǵa 20-dan astam ókilimiz qatysýda. Biz mundaı bastamany qoldaımyz. Aldaǵy kezde arnaıy qabyldaý pýnktterin ashý nıetindemiz. Bul kúngi erekshe sharaǵa 1500 adamnyń qatysqandyǵy basta­manyń baıandy bolatyndyǵyna senim qalyptastyrady. Baqbergen AMALBEK. Aqmola oblysy.