«Táýelsiz Qazaqstan» poıyzy – shejireli Shalqarda

Ústimizdegi jylǵy 1 qarasha kúni Astana qalasynan shyqqan «Táýelsiz Qazaqstan» poıyzy Shalqar qalasyna taban tiregen edi. Qazaqstan halqy Assambleıasynyń el Táýelsizdiginiń 25 jyldyǵyna arnaǵan respýblıkalyq aksııasynyń aıasynda jolǵa shyqqan poıyzdy shalqarlyqtar zor qoshemetpen qarsy aldy. Temir jol vokzalynda ertemen tynyq aýany tilgilegen áýezdi áýen men kúmbirlegen kúı meımandardy qarsy alý rásimine jıylǵan qaýymnyń qarasyn kóbeıte tústi. Aýdan ákiminiń mindetin ýaqytsha atqarýshy Elemes Shotanov egemendiktiń mereıli mereıtoıy qarsańynda Shalqarǵa taban tiregen qonaqtar qadamyna sáttilik tiledi. Eńbek ardageri, Shalqar aýdanynyń qurmetti azamaty Orazbaı Ádilbaev qonaqtarǵa aqsaqaldyq batasyn berip, shejireli Shalqardyń arǵy-bergi tarıhynan syr shertetin mazmundy áńgimeler tıegin aǵytty. «Táýelsiz Qazaqstan» poıyzynyń shtab jetekshisi Ámirjan Álpeıisov bul sapardyń maqsat-mindetine toqtaldy. Top jetekshisiniń aıtýynsha, bul quramda jeti mınıstrlikten jáne «Atameken» ulttyq kásipkerler palatasy men «QazAgro» ulttyq holdıngi, «Qazaqstan temirjoly» ulttyq kompanııasy» aksıonerlik qoǵamynan barlyǵy 271 adam bar, onyń 72-si medısına qyzmetkeri. – Basty maqsat – eldegi áleýmettik ahýalǵa kóńil bólip, Elbasy ustanǵan saıasattyń jetistikterin halyqqa jetkizý, buqara men bılik arasyndaǵy baılanysty odan ári nyǵaıtý. Kún tártibindegi máselelerge oraı biz aıaldaǵan jerlerde júıeli jumystar júrdi, nátıje bar. Osy sózimiz ben isimizdegi úılesimdilik Shalqarda da jalǵasyn tabady dep senimmen aıta alamyn, – dedi Á.Álpeıisov. Poıyz quramyndaǵy mamandar «Nur Otan» partııasy Shal­qar aýdandyq fılıaly ǵıma­ratynda, aýdandyq Mádenıet úıinde, aýdandyq ortalyq em­hanada turǵyndarǵa qoǵamdyq qa­byl­daýlar júrgizdi. Qabyldaýǵa kelgen turǵyndar saýalynyń deni – jumyssyzdyq jaıy boldy. Al «mekteptegi balama bıyl oqýlyq jetispedi», dep shaǵymdanǵan Baıan Sahıevanyń máselesi birden sheshildi. Balasy sal aýrýyna tap bolǵan Ádemi Piralyqyzy esimdi ananyń tilegi de taıaýda oryndalatyn boldy. Naýqas balasyn Astana qalasyndaǵy iri de bedeldi medısınalyq ortalyqtarda em­de­lýge kvota alyp berý qolǵa alyndy. Budan da ózge muń-muqtajyn aıtyp kelgen tur­ǵyn­dardyń máselesi jaýapsyz qalmaıtyn boldy. Múmkindigi shekteýli bala­larǵa ar­nal­ǵan Shalqar aýdanyn­daǵy pe­dagogı- ­kalyq-psıhologııa­lyq túzeý kabıne­tinde «Qaıyrym­dylyq kerýeni» atty shara ótti. Onda «Táýelsiz Qazaqstan» poıyzyndaǵylar túzeý kabınetiniń tárbıelenýshilerine syı­lyqtar tabystap, ónerlerin tamashalady. Aýdandyq ortalyq kitaphanada kitap­ha­nashy­larmen júzdesip, kitaphanaǵa Elbasynyń ómir joly, Táýelsizdikti tolǵaıtyn qundy kitap­tardy tabystady. Budan soń Mádenıet úıinde «Táýelsiz Qazaqstan» poıyzy jolaý­shy­larynyń qurmetine oraı konserttik baǵdarlama usynyldy. Jergilikti ónerpazdar óz ónerlerin kórsetip, kórermen qoshemetine bólendi. «Táýelsiz Qazaqstan» poıyzynyń aýdan ortalyǵyna aıaldaǵan bir kúninde onyń qoǵamdyq qabyldaýyna 120 adam jazylyp, medısınalyq keńes­ke 406 adam júgingen. «Táýel­siz Qa­zaq­stan» poıyzy odan ári  Qy­­zyl­orda oblysyna baǵyt túzedi. Satybaldy SÁÝIRBAI, «Egemen Qazaqstan», Muhtar MYRZALIN, jýrnalıst Aqtóbe oblysy, Shalqar aýdany