Parlament Májilisiniń jalpy otyrysynda palata depýtattary «Daktıloskopııalyq jáne genomdyq tirkeý týraly» zań jobasyn birinshi oqylymda maquldady.
«Zań jobasynda daktıloskopııalyq jáne genomdyq tirkeýdi júrgizýdiń quqyqtyq negizderi belgilengen. Sonymen qatar, osy jobada tirkeýden alynǵan aqparatty adamnyń jeke basyn rastaý jáne sáıkestendirý úshin paıdalaný máseleleri de naqty kórsetilip otyr», – dedi zań jobasy boıynsha baıandama jasaǵan Ishki ister mınıstri Qalmuhanbet Qasymov. Zań jobasynyń maqsaty – daktıloskopııalyq jáne genomdyq aqparat negizinde adamnyń tulǵasyn sáıkestendirýdi naqtylaýdyń quqyqtyq negizderin bekitý. Kórsetilgen mindetterge sáıkes, memlekettik daktıloskopııalyq jáne genomdyq tirkeýdiń quqyqtyq negizderin, negizgi túsinikterdi, ustanymdardy, aqparatty jınaý men óńdeýge tıisti talaptardy aıqyndaý eskerilgen. Daktıloskopııalyq aqparat turǵysynda adam qoly saýsaqtary papıllıarly órnekteriniń qurylysy týraly bıometrıkalyq málimetter qamtylady. Bul óz kezeginde adamdy jáne onyń jeke málimetterin anyqtaýǵa múmkindik beredi.
Genomdyq aqparat degenimiz, bul adam DNQ-synyń belgili bir fragmenti týraly kodtalǵan derekterdi jınaıdy. Zań jobasynda daktıloskopııalyq jáne genomdyq tirkeýge jatatyn tulǵalardyń toby, sondaı-aq, ony jınaıtyn jáne saqtaýǵa jaýapty memlekettik organdardyń tolyq tizbesi anyqtalady. 1992 jyly Qazaqstan qujattardyń bıometrıkalyq parametrleri týraly halyqaralyq kelisimdi ratıfıkasııalady. Qazirgi kezde tulǵany kýálandyratyn 11 qujattyń jeteýinde bıometrıkalyq kórsetkishterdi engizý qarastyrylady. Bizdiń tólqujattar men jeke kýálikterde elektrondy chıpter bekitilgen, bular arqyly bıometrıkalyq málimetterdi engizýge bolady. Daktıloskopıkalyq tirkeý tólqujat pen jeke kýálikti nemese teńizshiniń jeke kýáligin rásimdeý kezinde iske asyrylady. Balalar 12-den 16 jasqa deıin tólqujat alǵan kezde olar óz erkimen nemese ata-anasynyń kelisimimen daktıloskopıkalyq tirkeýge jatady. 12 jastan kishi balalar bundaı tirkeýmen qamtylmaıdy. Sonymen qatar, sheteldikter vıza alǵan kezde saýsaq izderin tapsyratyn bolady. Budan bólek, daktıloskopıkalyq tirkeý bosqyndarǵa, eńbek mıgranttaryna, Qazaqstanda turatyn sheteldikterge qatysty eskerilip otyr.